Кітап оқуға құштар білім ордасы

Мемлекет басшысы Қ.Тоқаевтың тапсырмасы бойынша «Оқуға құштар мектеп – оқуға құштар ұлт» жобасы бекітілген-тін. Аталмыш жоба кітап оқу арқылы балалардың рухани-адамгершілік құндылықтарын қалыптастыруға шақырды.

Баланы рухани бай етіп тәрбиелеудің сан түрлі жолдары бар. Сол жолдардың бірі және бірегейі – оларды кітап оқуға дағдыландыру. Өкініштісі сол, қазіргі қоғамда жастардың көркем әдебиетке деген қызығушылығы азайды. Әдебиетке деген құлықсыздық пайда болды. Оның себептері қазіргі жаңару мен жаһандану, өсу мен өрбу, даму мен ілгерілеу заманында, ақпараттар мен техниканың қарыштап дамыған заманында күнделікті қолданысқа енген техникалық құралдардың әсері деп білеміз.
Жылдар бойы М.Хәкімжанова атындағы №20 мектебінде оқуды насихаттауға байланысты көптеген іс-шаралар өткізілуде. Биылғы 2020-2021 оқу жылында келіп түскен көркем әдебиеттермен таныстыру мақсатында жарнамалық бейнеролик, түрлі тақырыптық, мерейтойлық көрмелер қойылды. Мектеп оқырмандары арасында «Буккросинг» акциясы да жиі ұйымдастырылып тұрады.


«Оқуға құштар мектеп – оқуға құштар ұлт» жобасы аясында «Менің сүйікті кітабым» челленджі бастау алды. Мектеп оқушылары «Абай оқулары», «Ыбырай оқулары», Махамбет шығармашылығын және оның туындыларын зерделеуді насихаттау мақсатында «Махамбет оқулары» және басқа да қалалық, облыстық және республикалық байқауларға қатысып, жүлделі орындарға ие болды. Мектебіміздің Instagram әлеуметтік желісіндегі парақшасында өткізіліп жатқан көрмелер, іс-шаралар мен челлендждер, әдеби байқаулар туралы ақпарат жарияланып тұрады.
Біріміз кітапты ой-өрісті кеңейту үшін оқысақ, біріміз жұмыс барысында ақпарат іздеу үшін пайдаланамыз. Енді бірі кітап оқып, одан рухани азық алады. Қандай себеп болмасын, оқу сауаттылығы дағдыларын дамыту маңызды. Оқу ой-өрістің кеңеюіне, жан-жақты дамуға, ойлау қабілетін жетілдіруге, шығармалардағы кейіпкерлердің мінез-құлқындағы жағымды тұстарын бойға сіңіруге көмектеседі, адамды тәрбиелейді және рухани байытады. Кітап оқуға бала кезден баулу керек. Себебі адамның әдебиетке деген махаббаты сол балалық шақтан қалыптасады.

Зура ТАСТАНОВА,
№ 20 ЖББМ
кітапхана меңгерушісі,
Қостанай қаласы