Кітап – рухани қазына

Абай атамыз: «Артық ғылым кітапта, ерінбей оқып білуге», – демекші, желкілдеп өскен жас бүлдіршіндердің кітап оқуға қызығушылығын ояту – тәрбиелік мәні зор іс. Осындай игі дәстүр мектебімізде жақсы қолға алынған.

Нақтырақ айтар болсақ, 1 «А» сыныбының оқушылары сынып жетекшісімен бірлесе кітапхана ішінде арнайы ұйымдастырылған саяхат сабақтың қонақтары болды. Ең алдымен оқушылар кітапхананы аралап, жақынырақ танысты. Сөрелерде ұқыпты жиналған түрлі-түсті кітаптар көздің жауын алады. Мектеп тәртібіне енді-енді бой үйреткен оқушылар өздерін еркін ұстады. Оларға кітапханашылар Г.Серікбаева мен Г.Уразалина кітапты дұрыс таңдай білу және ұқыпты ұстау, уақытында тапсыру сынды бірқатар оқырман ережелерімен таныстырып өтті.

Сонымен қатар балалар да сұрақтарын қойып, белсенділік танытып отырды. Кейін өздері ұнатқан кітаптарын үйлеріне оқуға алды. Олардың таңдаған кітаптары да өз жастарына сай суретті ертегілер мен қызықты журналдар. Танымдық жүздесу соңында кітапханашы апайларымыз оқушылардың сабақтарына сәттілік тілеп, кітапханаға жиі келіп тұруларын тіледі. Саяхат сабақтың соңында кітапханадан қойнына кітап қысып ұстап, марқайып шыққан оқушыларымды көргенде бұл олардың өмірлік хоббиіне айналса екен деген ойда қалдым. Себебі кітап оқуды жақсы әдетке айналдыру арқылы ғана шығармашылық ой-өрісің арта түспек.

Гүлфариза ИДИРИСОВА,
№19 ОМ бастауыш
сынып мұғалімі,
Рудный қаласы