Қостанайда үздік жүргізушілер анықталды

Қостанай облысы Полиция департаменті жолда тәртіп пен қауіпсіздікті нығайту, жол ережелерін сақтайтын жүргізушілерді қолдау мақсатында алғаш рет «Үлгілі жүргізуші-2025» профилактикалық акциясын өткізді.

– ҚР Ішкі саясат министрлігі жергілікті атқарушы органдардың қолдауымен ұйымдастырылған акция әртүрлі салаларда ұзақ жылдар бойы қызмет етіп, адамдарды, оның ішінде балаларды қауіпсіз тасымалдаған жүргізушілерді құрметтеу. Мұнда мектеп автобустарының жүргізушілері, қалалық автобус жүргізушілері, жедел жәрдем көліктерінің жүргізушілері секілді мамандар бар. Үздіктерді іріктеу барысында білім басқармасы мен денсаулық сақтау басқармасы, сондай-ақ автопарктердің басшыларына жүгіндік, олар ұзақ еңбек өтілі бар, жол ережелерін бұзбаған жүргізушілерді ұсынды. Олардың еңбегі – өзгелерге үлгі, – дейді Қостанай облысы Полиция департаментінің Әкімшілік саясат басқармасының аға инспекторы Махаббат Хусаинова.

Алқалы жиында сөз алған Қостанай облысы Полиция департаменті бастығының орынбасары, полиция полковнигі Қанат Меңдібаев, ең алдымен, ұзақ жылдар бойы балалар мен оқушыларды қауіпсіз тасымалдап жүрген мектеп автобустарының жүргізушілерін марапаттады. Ы.Алтынсарин атындағы Обаған ЖББМ жүргізушісі Юрий Мартыненко, №1 Заречный ЖББМ жүргізушісі Елик Муканов, Қостанай ауданындағы Мемлекеттік тілде білім беретін А.Байтұрсынұлы атындағы ЖББМ жүргізушісі Ақылбек Жигитов, Н.Островский атындағы Аманқарағай ЖББМ жүргізушісі Бақытжан Әбішев, Әулиекөл ауданындағы бастауыш мектеп-интернаттың жүргізушісі Эржигит Эгамбердиев жауапкершілік пен еңбекқорлықтың жарқын үлгісіне айналды.

Іс-шарада қаламыздағы №19 ЖББМ жас инспекторлар жасағы құрмет иелеріне өздері салған плакаттарын табыстап, жасап жатқан жұмыстарына алғыстарын жеткізді.
– Жас инспекторлар жасағы оқу жылының басында құрылған. Құрамындағы 7–8-сынып оқушылары жол ережелерін меңгеріп қана қоймай, жас жол реттеушіні үйренді, сонымен қатар «Ашық қоңырау» жобасына белсене қатысты. Бұл жобада педагогтеріміз ТМД елдері арасында бірінші орынды иеленгенін айта кеткен жөн, – дейді қаламыздағы №19 ЖББМ директорының тәрбие ісі жөніндегі орынбасары, дене шынықтыру пәнінің мұғалімі Талгат Дощанов.
Көп жылдық тәжірибесі бар қала автобустары мен жедел жәрдем жүргізушілері, сондай-ақ автомектептің үздік мамандары да марапатталып, қажырлы еңбектерінің лайықты бағасын алды. Олар үшін бұл күн – адал қызмет пен жауапкершіліктің еленген сәті болды.

Жамал ШАУКЕН