Қысқы ойындар фестивалі өтті

Тобыл қаласындағы Н.Наушабаев атындағы мектеп-гимназиясында 5-7 сыныптар арасында қысқы спорт фестивалі өтті. Онда спорттың төрт түрі қамтылды: шаңғы, футбол, арқан тартыс және нысана көздеу.

Жарыс балаларға көтеріңкі көңіл-күй сыйлап, шеберліктері мен ептіліктерін көрсетуге мүмкіндік берді. Шаңғы жарысының нәтижесінде 5-сыныптар арасында 1-орынға Әділет Досанов, 2-орынға Марис Искаков, 3-орын Әлинұр Жангереев ие болды. Ал 6-сынып оқушылары арасында 1-орынды Диас Ғалым, 2-орынды Елдар Хайдар, 3-орынды Иманғали Қабиев иеленді. 7-сыныптар оқушыларынан Медет Ошақбай 1-орынға ие болса, Жанболат Әбдікәрім 2-орынды қанжығасына байлады, ал Ален Аманжол 3-орынды місе тұтты.

Оқушылардың ерекше жақсы көретін ойындарының бірі – футболды қар үстінде өткізу тіптен қызық. Тартысты сайыста 5-7 сыныптардың оқушылары бақ сынап, 6 «А» сыныбының оқушылары қар үстінде допты қалай ойнаудың үлгісін көрсетті. Олар әуелі 6 «В» сыныбын 1:0 есебімен жеңсе, дәл осындай нәтижемен 7 «Ә» сыныбынан да айласын асырып, финалға шықты. Екінші топтың үздігі 6 «Б» сыныбы болды. Олар 5 «Ә» сыныбын 2:0, 5 «В» сыныбын 1:0 есебімен ұтып, финалға жолдама алды. Финалда кездескен 6 «А» мен 6 «Б» сыныбының алғашқысы 2:0 есебімен жеңіске жетті.

Тартысты өткен арқан тартыс бәсекесінде алғылық танытқан 6 «В» сыныбы жеңіске жетті. 2-орын 6 «Б» сыныбының еншісіне тисе, 3-орынды 5 «Ә» сыныбы місе тұтты. Келесі өткізілген нысана көздеуден 7-сыныптар арасында 1-орынға Сейітназар Серік (7 «В»), 2-орынға Санжар Бекенов (7 «Ә»), 3-орынға Әділхан Шалғынбаев (7 «В») тұрақтады. Ал 5-6 сыныптар арасында 1-орын Иманғали Қабиевке (6 «А»), 2-орын Аман Смаилға (6 «А»), ал 3-орын Азат Аблайға (5 «Ә») бұйырды. Жарыс барысында байқағанымыздай, балғындардың спортқа деген ынтасы артып, қабілеттері ашылды.

Рашит МҰХАНБЕТЖАНОВ,
Асқарбек САДЫҚОВ,
Н.Наушабаев ат. МГ
дене шынықтыру
пәнінің мұғалімдері,
Тобыл қаласы