Күш – білімде, білім – кітапта

Кітап – рухани азығымыз екені рас. Сондықтан «Оқуға құштар мектеп» жобасы бойынша бастауыш сынып оқушылары арасында «Ахмет Байтұрсынұлының балалар шығармалары» атты оқу ұйымдастырылды. 

«Ұлттың сақталуына да, жоғалуына да себеп болатын нәрсенің ең қуаттысы – тілі», – деп жазып кеткен Ахмет Байтұрсынұлы. Жоғарыда аталған іс-шараның мақсаты – Ахмет Байтұрсынұлы атамыздың өмірбаянымен және оның балаларға арналған шығармаларымен, нақыл сөздерімен таныстыру. Сонымен қатар оқушылардың сөздік қорларын дамыту, Ахаңның өлеңдерін оқыту арқылы еңбексүйгіштікке, достық пен бірлікке баулу, шығармаларын мәнерлеп оқуда сөзді анық айтуға және есте сақтау қабілеттерін дамыту да назардан тыс қалмады.

Ахмет Байтұрсынұлының «Оқуға шақыру» мен «Аққу, шортан Һәм шаян» мысалын мәнерлеп оқуда 2-сынып оқушылары Амир Қуанышбаев пен Ерасыл Испулов (сынып жетекшісі – Исмагулова Мариям Хамзановна) және 4-сынып оқушысы Жанна Куанышева ерекше көзге түсті. Аталған оқушылар өздеріне берілген тапсырманы ерекше ынтамен, мәнерлеп оқып берді. Балалар еліміздің білімді ұрпақтарының қатарын арттырып, бабаларымыздан аманат болып қалған тілімізді қастерлеуге үлестерін қосатынына кәміл сенемін!

Сандыгаш НАУРЫЗБАЕВА,
Краснопреснен ЖББМ
бастауыш сынып мұғалімі,
Меңдіқара ауданы