«Мәңгі өшпес жарық жұлдыз»

Жуырда қазақ даласының ұлы перзенті, ғалым-геолог, Қазақстанның тұңғыш академиясының негізін қалаушы Қаныш Сәтбаевтың туғанына 123 жыл толуына орай Рудный қаласындағы №15 ЖББ мектепте іс-шара ұйымдастырылды.

«Қаныш Сәтбаевтың туғанына 123 жыл» тақырыбындағы тағылымы мол шара жоғары сынып оқушылары арасында түрлі бағытта ұйымдастырылған жұмыс түрлерін қамтыды. Тарқатып айтар болсам, 10 «А» сыныбында физика пәнінің мұғалімі Бағдагүл Ошанова мен химия пәнінің мұғалімі Рыскүл Мустафинаның ұйымдастырымен «Халқым менен де биік»: Әйгілі ғалым Қаныш Сәтбаев туралы не білеміз?» тақырыбында пікірталас өткізілді. Пікірталас аясында «Қ.Сәтбаевтың өмір жолы» бейнебаяны көрсетіліп, оның елі үшін жасаған елеулі еңбектері ортаға салынып, оқушылар біраз деректерге қанық болды. Сонымен қатар көптеген ақын-жазушылардың Қаныш ағамызға арналған өлең-жолдарын мәнерлеп оқып берді.

Аталған іс-шараның жалғасы ретінде 11 «А» сыныбында топтық жұмыс түрінде «Қазақтың Қанышы» тақырыбындағы іс-шара өткізілді. Оның аясында тарих пәнінің мұғалімі Жазира Бейсенғалиева Қ.Сәтбаевтың өмірбаянына қатысты сұрақ-тапсырмалар жұмыстарын жүргізді. Ал география пәнінің мұғалімі Фазира Дағарова Қ.Сәтбаевтың зерттеулеріне, еңбетеріне шолу жасаса, 8 «А» сыныбында кітапханашы Мадина Нургазинова сәуірдің 12-сі күнгі Ғылым күніне орай «Мәңгі сөнбес жарық жұлдыз» тақырыбында көрме ұйымдастырды. Ғибраты мол шараға қазақ тілі мен әдебиеті пәнінің мұғалімдері де белсене ат салысты. Әсел Жылдамқұлова 9-сыныпта, Наргүл Қарағұлова 6-сыныпта «Әлеуметтік желідегі таныстырылым» челленджін ұйымдастырды.

Академик Қ.Сәтбаев саналы ғұмырында «барлығынан күмәндан және тек фактіге ғана жүгін» деген ұстанымымен, ғылыми және академиялық пікірталас пен талқылау жүргізе алу, ғылыми материалды жинақтау мен анализ жасай білу өнерімен көзге түсіп, ғылымға жол ашты. Ендігі кезекте, оның мол мұрасын жас ұрпаққа жеткізу ұстаздардың еншісіне тиесілі. Осы мақсатты жалау еткен іс-шара да жоғары деңгейде өз мәресіне жетіп, оқушылар тың мағлұматтардан өздеріне бойтұмардай ой түйгені анық. Оны шараға қатысу барысында оқушылардың көрсеткен белсенділігі мен кері байланысынан анық байқадық.

Тағылымы мол шара барысында жоғарғы сынып оқушылары да өздігінен ізденіп, ашық сабақтарда ғалым туралы білетіндерін ортаға салып жатты. Бұл, әрине, оқушылардың бейтарап қалмай, іс-шараға өз үлестерін қосуы деп түсіндік. Мектебімізде халқының лайықты ұлы Қ.Сәтбаевтың ұшан-теңіз еңбегін дәріптеу әлі де жалғасын таба бермек.

Роза ЖАРҚЫМБЕКОВА,
№15 ЖББМ бастауыш
сыныптар мұғалімі,
Рудный қаласы