Мектептегі «Әкелер кеңесі»

Рудный қаласындағы Бейімбет Майлин атындағы №7 мектеп-гимназиясының ұстаздары мен ата-аналарының өзара іс-қимылын жақсартуға бағытталған «Үндестік» жобасы негізінде мектебімізде «Әкелер кеңесі» өтті.

«Бала тәрбиесіндегі әкенің рөлі» тақырыбы аясында өткен кеңес мектеп пен ата-ананың арасындағы қарым-қатынасты жақсартып, оқушылардың әкелерге деген құрмет сезімін нығайтуды мақсат етті. Әр отбасындағы әкенің рөлі ерекше. Әке – отбасының асыраушысы, отбасы мүшесінің тірегі, қамқоршысы. Әкенің мінез-құлқы, өзгелермен қарым-қатынасы, өнері мен білімі баланың көз алдындағы үлгі-өнеге алатын, оған қарап өсетін нысанасы екендігін үлкендер назарына сала отырып, әкенің бала тәрбиесіне, оның біліміне, тәртібіне ықпал етуіне ата-ана белсенділігін арттыру көзделді.

Кеңесте «Мен жақсы әкемін бе?», «Ең жылдам әке» сынды топтық жұмыстар да ұлттық педагогикамыздың элементтеріне сүйене отырып ұйымдастырылды. Қамшы өру, қонақасын жіліктеп мүшелеу, ат әбзелдерін атау, әдеби тосап бөлімдерінен құралды. Халық даналығында «Бір әкенің берер тәрбиесін жүз мектеп ауыстыра алмайды» демекші, ұрпақ тәрбиесіне әкелеріміздің сабақтасуы көңілімізді марқайтады. Саламатты өмір салтын ұстанған әкелерімізге балаларды зиянды әрекеттерден сақтап, бос уақытын тиімді ұйымдастыруда өз уақыттарын аямай ықпалдасқаны үшін алғысымызды білдіреміз.

Роза АХМЕТОВА,
Б.Майлин атындағы
№7 мектеп-гимназиясы
директорының тәрбие
ісі жөніндегі орынбасары
Рудный қаласы