Мектептегі тәрбие жұмысының үлгісімен

Қазіргі кезде өсіп келе жатқан ұрпақты тәрбиелеудегі негізгі мақсат – қоғамға пайдалы, үлкенге құрмет көрсетіп, кішіге қамқор бола алатын, жан-жақты дамыған жеке тұлғаны қалыптастыру болып табылады.

Біз өмір сүріп отырған ХХІ ғасыр – ғылым мен технологияның қарыштап дамыған уақыты. Ақпараттандыру, жаһандану мен интеграция ғасырында жаңа дүние үшін күрес жолында адамзат баласына білім беру бірінші кезекке қойылатыны сөзсіз. Қазір қоғамдық көзқарастар да күннен-күнге өзгеру үстінде. Әрбір ақпарат құралдарының жұмысындағы барлық шектеулер алынып, ақпарат тарату еркіндігіне кең жол ашылуы балалардың сана-сезімі мен рухына әсер етуде.

Тәрбиенің қандай саласы болмасын, бір арнаға тоғысуы керек. Сондықтан да, қазіргі кезде алдымызда тұрған үлкен міндет – ұрпағымызға адамгершілік құндылықтар арқылы тәрбие беру болып отыр. Осы тұста жас ұрпақты тәрбиелеуде халқымыздың сан ғасырлық тәжірибесі бар екендігі баршамызға аян. Сол тәжірибені пайдалана отырып, тәрбие жан тазалығына, адамгершілік игі қасиеттерге, парасаттылыққа, елжандылыққа негізделуі тиіс. Оның айқын көрінісі – ұлттық, адами құндылықтарға негізделген «Біртұтас тәрбие» бағдарламасы.

Аталмыш құжатта білім беру ұйымдарындағы тәрбие жұмысын толыққанды жүзеге асыру үшін білім алушылардың бойында қалыптастырылуы тиіс құндылықтар мен тәрбиенің мақсаты мен міндеттері айқындалады. Соның негізінде жалпыадамзаттық және ұлттық құндылықтарды бойына сіңірген, әлемдік озық білімді игерген саналы азаматты тәрбиелеу мақсаты көзделеді. Осы ретте жақында Қостанай ауданына қарасты Мичурин жалпы білім беретін мектебінде «Мектептің тәрбие жұмысын ұйымдастырудағы жаңа әдістер» тақырыбында аудандық семинар өтті.

Семинар жұмысы үш секция аясында жүргізіліп, жұмыс оқыту мен тәжірибеге, жаңа жұмыс технологияларын көрсетуге бағытталды. Қатысушылар үшін Мичурин мектебінің және Балалар шығармашылық үйінің тәжірибелі педагогтері жұмыс істеді. Атап айтар болсақ, Мичурин ЖББ мектебінің бастауыш сынып мұғалімі Ж.Маденова, қазақ тілі мен әдебиеті пәнінің мұғалімдері Н.Ермагамбетова, Г.Баймуханова, химия пәнінің мұғалімі А.Алдабергенова және директордың тәрбие ісі жөніндегі орынбасарлары ретінде біз де өз тәжірибелерімізбен бөлістік. Іс-шараға директордың тәрбие ісі жөніндегі орынбасарлары, қосымша білім беру педагогтері, пікірсайыс үйірмелерінің жетекшілері қатысты.

Семинар қатысушылары берілген тапсырмармаларды орындауда белсенділік танытып, сонымен қатар, жаңа жұмыс әдіс-тәсілдерімен танысты. Семинар барысында шеберлік сағаттар көрсетіліп, спикерлер жұмыс тәжірибелерімен, білімдерімен бөлісті. Осылайша тағылымды семинар соңында қатысушылар ақпараттың пайдалылығы мен тәжірибелік тұстары туралы, сондай-ақ осындай іс-шаралардың жиі ұйымдастырылу қажеттігін атап өтті.

Ерасыл ҚАЗЫБАЕВ,
Айжан ЖАБАЕВА,
Мичурин ЖББМ
директордың тәрбие ісі
жөніндегі орынбасарлары,
Қостанай ауданы