Міржақып Дулатұлы мұражайы ашылды

Выпуск - №43(691) : 21.11.2025

708

Рудный қаласындағы Міржақып Дулатұлы атындағы жалпы білім беретін мектепте қазақтың аса көрнекті ағартушысы Міржақып Дулатұлының 140 жылдығына орай «Ел үшін туған ердің мәңгілік мұрасы» атты мұражайдың салтанатты ашылу рәсімі өтті.

Міржақып Дулатұлының өмір жолы мен шығармашылығына арналған мұражайдың ашылу салтанаты дәстүрлі лента қию рәсімімен басталды. Бұл мәртебелі іс филология ғылымдарының кандидаты, доцент, мәдениет саласының үздігі, айтыскер-ақын, «Алтын домбыра-2025» иегері Айбек Қалиев, Рудный қаласы білім бөлімінің басшысы Темірхан Жайлибаев, сондай-ақ Рудный қаласының ҚХА Ардагерлер кеңесінің төрағасы, қаламгер және қоғам қайраткері Жаңбыршы Тлеуғабыловқа табыс етілді.

Іс-шараға облысымыздың құрметті азаматтары, сөздің киесін ұлықтаған айтыскер-ақындар, руханият пен мәдениет саласының майталмандары, сондай-ақ БАҚ өкілдері қатысып, басқосудың мәртебесін арттыра түсті. Шашу шашылып, қонақтар жаңа мұражай экспонаттарымен, заманауи көрмемен танысып, Міржақып Дулатұлының өмірі мен шығармашылығына терең бойлады. Бұл мұражай – тек өткенді еске алу емес, жас ұрпақты елін сүюге, тарихын құрметтеуге тәрбиелейтін рухани орта. Міржақып бабамыздың аманаты жас ұрпақ жүрегінде жаңғыра берсін!