Мұғалімдердің намыс додасы

Тәуелсіздіктің 30 жылдығы қарасаңында мектеп мұғалімдері арасында ұлттық спорт түрлерін насихаттау, сол арқылы саламатты өмір салтын дәріптеу мақсатында спорттық сайыс ұйымдастырылды.

Осы мақсатта Қостанай қаласындағы №115 жалпы білім беретін мектебінің қабырғасында ГСМ, №9 ЖББМ, №15 ЖББМ, №20 ЖББМ, №115 ЖББМ, №28 мектеп-гимназиясы арасында спорттық дода ұйымдастырылды. Сайыс тоғызқұмалақ, арқан тарту, қол күрес, гір көтеру, волейбол, дартс, үстел теннисі спорт түрлерінен өткізілді. Жалпы сайысқа 80 мұғалім қатысты. Оның ішінде: директор орынбасарлары, пәні мұғалімдері, сынып жетекшілері де қатысқанын айта кеткен ләзім.

Барлық мұғалімдер өздерін спортқа шымыр, жеңіске құштар екендіктерін көрсетті. Мектеп жұмысы, сабақ беру, құжаттармен жұмыс сияқты күнделікті жұмыстан басқа саламатты өмір салтын ұстанатындықтарын да паш етті. Сайыс нәтижесі бойынша жалпы командалық есепте І орынға №115 жалпы білім беретін мектебі, ІІ орынға №28 мектеп-гимназиясы, ал ІІІ орынға №15 жалпы білім беретін мектебі ие болды. Жас ұрпаққа үздіксіз білім мен тәрбие беріп жүрген мектеп мұғалімдері спортты да жанына серік еткені көңіл қуантады.

Айкерим УСМАНОВА,
№115 ЖББМ директордың
оқу ісі жөніндегі орынбасары,
Қостанай қаласы