«Mynbala.kz» жобасы: білім жолындағы керуен

Қарабалық ауданындағы М.Сералин атындағы жалпы білім беретін мектепте ауылдық мектеп оқушыларына арналған білім беру керуені форматындағы бірегей жоба – «Mynbala.kz» мобильді кванториумы өз жұмысын бастады.

Жоба биылғы Жұмысшы мамандықтарының жылы аясында жүзеге асырылып, оқушылардың инженерлік және технологиялық ойлау қабілетін дамытуға бағытталған. Жобаның бастамашылары және серіктестері – Eurasian Resources Group (ERG), Allur компаниялар тобы және «Talimger» қоғамдық қоры екенін атап өткен жөн. Оқушылардың кәсіби бағдарлануын қамтамасыз етуге арналған заманауи, мобильді және қолжетімді білім беру ортасын қалыптастыруға бағытталған бірегей жоба тәжірибеге негізделген оқыту арқылы жүзеге асады.

«Mynbala.kz» жобасының аясында сызба және инженерлік жобалау негіздері, математика мен физиканың қолданбалы есептері, робототехника және 3D модельдеу, сондай-ақ электротехника және схемотехника, кәсіпкерлік ойлау негіздері, жасанды интеллектпен жұмыс істеу дағдылары сынды бірнеше оқыту бағыттары қамтылған. Жоба барысында кәсіби бағдарлау диагностикасына ерекше көңіл бөлінеді. Соның нәтижесінде әр қатысушыға жеке портфолио құрастырылып, оған оқушының қызығушылықтары, қабілеттері және жеке даму бағыттары енгізіледі.
 

Аталмыш жобаға ауданымыздың 7–10-сынып оқушылары қатысып, робототехникадан бастап генеративті жасанды интеллектке дейінгі заманауи технологиялардың жұмыс принциптерімен танысты. Көптеген оқушылардың инженерлік-техникалық салаға қызығушылығы, оқуға деген ынтасы артқаны байқалды. Жоба білім беру бағдарламасының бір бөлігіне айналып қана қоймай, жазғы демалысты тиімді өткізіп, мектеп пен отбасы арасындағы байланысты нығайтуға және кәсіптік қоғамдастықпен ынтымақтастықты кеңейтуге мүмкіндік берді.
Жобаның ұйымдастырушылары мектеп кітапханасына Дәулет Төлеутайұлының «Бизнеске бағыт» кітаптарын сыйға тартты. Бұл еңбек жас ұрпақты қаржылық сауаттылыққа баулып, табысқа жету жолдарын меңгеріп, жауапкершілікпен әрекет етуге үйретеді. Автор жастарды өз армандарына нық қадам басуға шақырады. «Mynbala.kz» мобильді кванториумы – бұл жай ғана білім керуені емес, аймақтың болашағына бағытталған стратегиялық инвестиция. Жоба техникалық сауатты, мақсаттарын айқын белгілейтін, жаңашыл ұрпақтың қалыптасуына ықпал етеді.

Айгерим АХМЕТОВА,
М.Сералин атындағы ЖББМ
директордың тәрбие ісі
жөніндегі орынбасары,
Қарабалық ауданы