Өңірлік саптық-ән байқауы өтті

Кеңес әскерлерінің Ауғанстан жерінен шығарылғанына 33 жыл толуына орай Ы.Алтынсарин атындағы Обаған мектебінде облыстық «Саптық ән» байқауы өтті. Оған «Жас сарбаз» мамандандырылған 5-11 сыныпта тәрбиеленуші оқушылар қатысты.

Ауған қаһармандарын қадірлеп, құрметтеп, рух жасампаздығымен жаңартуды көздеген шара алғашқы әскери дайындық пәнінің мұғалімі Талғат Сейдазымовтың ұйымдастыруымен өтті. Іс-шараға аудандық білім бөлімінің басшысы Ақмаржан Бермаганбетова; Алтынсарин және Қостанай аудандық қорғаныс істері жөніндегі біріккен бөлімінің басшысы, подполковник Сабит Аймуханов; Алтынсарин және Қостанай аудандық қорғаныс істері жөніндегі біріккен бөлімі бастығының орынбасары, капитан Малик Ренов; Ауған соғысының ардагерлері Сапарғали Туткушев, Ербол Ибраев қатысты. Іс-шара барысында келген қонақтарды мектеп оқушылары мектеп тарихымен таныстырып, мектеп басшысы Н.Ахмадиева құттықтап, жас сарбаздарға сәттілік тіледі.

Ауқымды жиынға облысымыздың түкпір-түкпірінен, атап өтер болсақ, мемлекеттік тілде оқытатын Заречный жалпы білім беретін мектебі, Рудный қаласындағы №19 жалпы білім беретін мектебі және Ы.Алтынсарин атындағы Обаған жалпы білім беретін мектебінің «Жас сарбаз» мамандандырылған сыныптарының тәрбиеленушілері қатысып, өздерінің саптық элементтерді орындау шеберліктерін ортаға салды. Жас сарбаздар үлкен дайындықпен келген. Әділ қазылар алқасының шешімі бойынша, мемлекеттік тілде оқытатын Заречный жалпы білім беретін мектебі 1-орын, Рудный қаласындағы №19 жалпы білім беретін мектебі 2-орын және Ы.Алтынсарин атындағы Обаған мектебінің «Жас сарбаз» мамандандырылған сыныптарының тәрбиеленушілері 3-орынды иеленді.

Облыстық деңгейдегі шара жоғары деңгейде өтті. Ауған соғысының тарихи маңызын ашу, егемендік жолында күрескен ағаларымыздың ерлігін кейінгі ұрпаққа үлгі ету, бүгін әр салада елдің дамуына ат салысып жүрген ардагер жауынгерлерді құрметтеу – біздің борышымыз.

Арайлым АХМЕТЖАНОВА,
Ы.Алтынсарин атындағы
Обаған ЖББМ
директорының тәрбие ісі
жөніндегі орынбасары,
Алтынсарин ауданы