Өлеңді мектебіндегі берекелі басқосу

Тіршілікке нәр берген Наурыз мейрамы халқымыз үшін қашанда қастерлі. Көктемнің шуақты күндерімен ұласқан осы бір айтулы мерекеге орай Өлеңді негізгі орта мектебінде «Қош келдің, әз-Наурыз!» атты кең көлемді әрі мазмұнды іс-шара ұйымдастырылды.

Ұлттық құндылықтарымызды дәріптеп, ата-бабамыздан қалған салт-дәстүрімізді жаңғыртуды мақсат еткен бұл жиын оқушылардың бойына патриоттық рух пен адамгершілік қасиеттерді сіңіруде ерекше рөл атқарды. Мереке аясында мектептің спорт залы ұлттық нақышта безендіріліп, қазақы салт-дәстүрден көріністер ұсынылды. Күмбірлеген күй мен әсем әуен қалықтаған кеште мектеп ұжымы мен оқушылар ғана емес, ата-аналар да ұлттық киімдерін киіп, ән айтып, би билеп, өнерлерін ортаға салды.

Қазақтың дәстүрлі ойындары мен сахналанған салт-дәстүрлер көпшіліктің ыстық ықыласына бөленіп, өнерлі өрендердің дайындық деңгейінің жоғары екенін аңғартты. Ата-аналар қауымының белсенділігіне ерекше тоқталып өткен жөн. Қазақтың дәмді тағамдарынан көрме ұйымдастырып, берекелі дастархан әзірлеу арқылы олар мектеп өміріне шынайы жанашырлықтарын танытты. Ұстаздар мен ата-аналардың осындай бірлескен еңбегінің нәтижесінде мереке шынайы жылулық пен ынтымаққа толы болды.
Өлеңді мектебінде жоғары деңгейде өткен бұл думанды іс-шара қатысушыларға көтеріңкі көңіл-күй сыйлап, жас ұрпақтың санасында ұлттық рухты берік орнықтырды. Жаңару мен жақсылықтың нышаны болған әз-Наурыздың осылайша салтанат құруы – елдік бірлігіміз бен дәстүр сабақтастығының айқын көрінісі болса керек.

Гульзада БУХАНОВА,
Өлеңді негізгі орта мектебінің мұғалімі,
Науырзым ауданы