Өнерде өшпес ізің бар

Тасты жалпы білім беретін мектебінде «Қазақтың 100 әні» жобасы аясында жергілікті композиторлармен тағылымды кездесу ұйымдастырылды. 

Талантты өнер иелерімен жүздесудің негізінде олардың шығармашылығын оқушылар арасында кеңінен таратып, төл мәдениетке үлесін қосып жүрген тұлғаларды насихаттау арқылы жастардың бойында ұлттық рухты қалыптастыруға бағытталған бұл тағылымды шара мазмұндылығымен есте қалды. 
Бағдарламасы бойынша шақырылған құрметті қонақтар Кейкі батыр атындағы тарихи-өлкетану мұражайымен танысқан соң, оқушылармен кездесу алаңына келді. Ең әуелі, жас буын өкілдерінің назарына мәртебелі меймандардың өмірі мен шығармашылық өнері туралы ақпараттар ұсынылып, арнайы әзірленген бейнежазбалар көрсетілді.

Олардың құрамында атақты күйші, танамыл композитор, тағдыр тәлкегіне түссе де (оң қолынан айырылуы), домбырасын қолынан тастамай, өмірлік серік еткен Айтбай Мұздаханов және Амангелді аудандық саз мектебінің директоры, бірнеше күйлердің авторы, облыстық, республикалық байқаулардың бірнеше мәрте жеңімпазы Кенжеболат Әлібекұлы бар болатын. 
Тағылымды шараға мектебіміздің 9-11 сынып оқушылары, ұстаздар, ауылымыздың өнерсүйер тұрғындары, ауыл имамы, өнерді бағалай білетін Мейрамхан Жәуке қатысты. Қонақтардың сөзінен кейін оқушылар өнерлерін ортаға салып, бірі күй тартса, екіншілері патриоттық ән шырқау арқылы кештің көрігін қыздырды. Қатысушы жастар аға буын өкілдеріне көкейтесті сауалдарын қойып, қонақ кәде сұрады. Жүздесу қорытындысында ұстаздар ұжымының басшысы Айсұлу Әнуарқызы өнер иелеріне ризашылық лебізін жеткізіп, естелік сыйлықпен бірге Алғыс хат табыстады.
Артынша Айтбай Мұздаханов жиналғандарға ақ батасын беріп, қонақтарға қазақтың дәстүрі бойынша шапан жабылды. Ғасырларға жалғасқан ұрпақтар сабақтастығы үзілмей, аға буын кейінгі жастарға дұрыс бағыт пен бағдар беру арқылы жақсылықтарға жетелесе, тәуелсіз еліміздің еңсесі әрқашан биік болары даусыз. Рухани жаңғыруды көздеген бірегей бағдарламаның іске асырылуындағы атқарылатын ауқымды шаралар ұлттың жаңғыруына қызмет жасауы қажеттілігін көрудеміз. 

Луиза АБДИРОВА,
Тасты ЖББМ директордың
тәрбие ісі жөніндегі орынбасары,
Амангелді ауданы