Отан қорғау – абыройлы парыз

Выпуск - №18 (465)   :   06.05.2021
420

Жастарды әскери-патриоттық бағытта тәрбиелеу мақсатында Отан қорғаушылар күні мен Жеңіс күнін мерекелеу шеңберінде облысымыздың білім беру ұйымдарында арнайы іс-шаралар өткізу жоспарланған.

Осы тұста Бауыржан Момышұлы атындағы №5 орта мектепте «Вахта памяти» арнайы акциясы өтті. Әскери-патриоттық бағытты ұстанған білім ордасында оқушылар азаматтық және кадет сыныптарында білім алуда.

Шараға кадет сыныптарының 30-ға жуық тәрбиеленушісі ат салысты. Санитарлық талаптарды қатаң сақтай отырып ұйымдастырылған шара сапқа тұру рәсімінен басталып, білім ордасында 2017 жылдан бері жұмыс істеп тұрған Б.Момышұлы мұражайына жасалған экскурсиямен жалғасын тапты.



– Мұражайда батырдың өмірі мен шығармашылығына арналған материалдар жинақталған. Желтоқсанның 24-інде болатын батырдың туған күніне орай жыл сайын қалалық Бауыржан оқулары өтеді. Ол оқушылардың сурет салу, мәнерлеп оқу, ақындық сынды қабілеттеріне қатысты бағыттарды қамтиды. Бұл күндері мұражай ішінде оқушылардың салған суреттері, батырдың қаламынан туған шығармалар, өмір жолынан сыр шертер мәліметтер қамтылған стенд-қабырғалар қойылған. Әрине, әзірге материал аз. Жазда жол түсіп жатса, Бауыржан атамыздың туған жеріне барып, өзі қолданған дүниелерді алып келіп, мұражайды кеңейту ісін қолға алу ойда бар, – дейді мектеп мұражайының меңгерушісі Айнаш Купобаева.



Білім ордасы 2015 жылы Бауыржан Момышұлының есімін иеленген. Ал жалпы мектепте кадет сыныптары 2011 жылы ашылған. Содан бері жастарға әскери-патриоттық тәрбие беру ісіне подполковник Черкасов Иван Иванович тікелей ат салысып, қажет бағыт-бағдар беріп келеді.

Мұражайда жасалған экскурсиядан соң акция мектептің екінші қабатында орнатылған Бауыржан Момышұлының бюстінің жанындағы шағын шерумен жалғасып, кейін қару-жарақты жинап-шашу үлгісі көрсетілді. Акция мектеп ауласында барабаншылардың және кадет сыныбының тәрбиеленушілерінің шеруімен аяқталды.



Жалпы Ұлы Жеңіс күніне және Отан қорғаушылар күніне арналған шаралар облыс көлеміндегі білім ордалары мен колледждерде ардагерлер мен әскери қызметшілердің қашықтан қатысуымен тақырыптық бейне-сабақтар мен онлайн сынып сағаттары өткізіледі деп жоспарлануда. Дәстүрлі түрде қалалар мен аудандарда акциялар аясында қолдарынан келгенше көмек көрсетіп, оларға концерттік бағдарламалар дайындайды.

Жамал ШАУКЕН,
суретті түсірген автор

 

Реклама