Рәміздер рухымызды біріктірді

Қостанай ауданына қарасты №1 Заречный жалпы білім беретін мектебінде ҚР Мемлекеттік рәміздері күніне орай «Keleshek Camp» мектеп жанындағы жазғы лагерінің І патриоттық ауысымының салтанатты ашылуы өтті.

Іс-шараға лагерь тәрбиеленушілері, ата-аналар, педагогтер мен мектеп қызметкерлері қатысты. Салтанатты жиын Мемлекеттік Туды енгізуден басталып, барлық қатысушылар ҚР Мемлекеттік Әнұранын орындады. Бұл сәт жас ұрпақтың бойында елге деген сүйіспеншілік пен патриоттық сезімді нығайтып, мемлекеттік рәміздерге деген құрметті арттыруға бағытталды.
Лагерьдің алғашқы ауысымының ашылу рәсімінде әрбір топ шығармашылық ерекшеліктерін көрсетті. Сондай-ақ лагерь тәлімгерлерін қабылдау рәсімі ұйымдастырылып, оқушылар жазғы демалыс кезеңіндегі жаңа бастамалармен танысты. Іс-шараның ерекше бөлігінің бірі – жаппай патриоттық флешмоб болды. Қатысушылар «Мен қазақпын» әнін бірлесе орындап, патриоттық мазмұндағы ұрандарды хормен айтып, туған елге деген мақтаныш сезімдерін білдірді.
Мектептің футбол алаңында өткен мерекелік іс-шараға барлығы 350 оқушы, 40 педагог, 20 ата-ана және 10 қызметкер қатысты. Ұзақтығы 25 минутқа жоспарланған іс-шара жоғары деңгейде ұйымдастырылып, қатысушыларға ерекше көңіл-күй сыйлады. «Keleshek Camp» лагері жаз бойы балалардың шығармашылық, зияткерлік және көшбасшылық қабілеттерін дамытуға бағытталған түрлі жобалар мен іс-шараларды жүзеге асыруды жоспарлап отыр.

Ерасыл ҚАЗЫБАЕВ,
№1 Заречный жалпы
білім беретін мектебі
басшысының тәрбие ісі
жөніндегі орынбасары,
Қостанай ауданы