Рухани қазына ордасына саяхат

Рудный қаласындағы Әлихан Бөкейхан атындағы ЖББ мектебіміздің 2 «А» сынып оқушылары бірінші тоқсаннан кейінгі күзгі демалыста «Рудный орталықтандырылған кітапхана жүйесі» ММ №11 кітапхана-филиалына саяхат жасады.

Ағартушы Ыбырай Алтынсарин атамыз: «Оқысаңыз, балалар, шамнан шырақ жағылар», – деп болашақты көрегендікпен болжаған. Мұндағы «шам» дегені – тұңғиық терең білім, ғылым болса керек. Осынау білім деген шамның жарқырай түсуі үшін кітаптың, сол кітаптың жинақталар жері – кітапхананың қашанда тұғыры биік болуы тиіс. Оқушылардың бойында ұлттық сананы ояту, кітапқа деген қызығушылығын арттыру, ұлттық рухты сіңіру, кітапты сүюге, оны күтіп таза ұстауға тәрбиелеу мақсатындағы саяхат оқушыларға үлкен әсер қалдырды.

Кітапханашы Алия Абдикаликова оқушыларға кітапхана туралы ақпарат беріп, кітаптармен таныстырды. Өз сөзінде рухани тарихын, ата-бабаларымыздың салт-дәстүрлерін, әдет-ғұрпын тануда кітаптың пайдасы, оның берер көмегі зор екенін атап өтті. Балалар мен жасөспірімдерге арналған «Балдырған», «Айгөлек», «Ақжелкен» және «Зелёное яблоко» газет-журналдарымен қатар қызықты ертегілер мен кітаптар туралы айтты. Бүгінде сол асыл қазыналарымызды жас буынға жеткізуші алтын көпір – кітапхана мен кітапханашылар. Кітаптың қадірін біліп, оның маңызын шынайы бағалай білетін жастарымыздың қатары арта берсін дейміз.

Ұлбосын СӘБДЕНБЕКОВА,
Ә.Бөкейхан атындағы
ЖББМ бастауыш
сынып мұғалімі,
Рудный қаласы