Саламаттылық – салтымыз

«Спорт – денсаулық кепілі» демекші, қазіргі уақытта баланы спортқа болсын, басқа өнер түріне баулу болсын, алдымен ата-ана өзі бастама жасап, отбасында саламаттылықты ұстап, спортқа көңіл бөліп, жақсы әдет қалыптастыруы қажет.

Жасөспірімдер арасында саламатты өмір салтын насихаттау, спорттың көптеген пайдалы жағын сезінсін деген мақсатпен мектебімізде ата-аналар мен оқушылар және ұстаздар арасында волейбол сайысын ұйымдастырылды. Мектеп пен ата-аналардың қарым-қатынасын жандандыруды көздеген шара «Біртұтас тәрбие» бағдарламасын негізге ала отырып, «Үштік одақ» жұмысы мен «Үндестік» жобасы аясында өткізілді.

Жарысқа аналардан 2 команда, әкелерден 1 команда, сонымен қатар қыз балалар командасы және ұстаздардан 1 ер азаматтар мен 1 әйел мұғалімдер командасы қатысты. Жарыс барысында ата-аналардың спортқа деген көзқарасы сол отбасының балаларына да қаншалықты әсер ететінін түсіндік. Жалпы М.Әуезов атындағы №5 ЖББ мектебінің оқушылары қалалық, облыстық спорттық сайыстардың әр түрінен белсенді әрі жүлдегерлері десек, артық айтпаймыз.

Мектебімізде түрлі деңгейдегі спорт додаларында мектебіміздің ғана емес, барша Арқалық қаласының даңқын асқақтытып жүрген оқушыларымыз да бар. Атап айтатын болсам, бокстан Халықаралық сайыста 1-орын және республикалық сайыстардың бірнеше дүркін жеңімпазы Мәди Рақымжан, зіл темір көтеруден Республикалық және облыстық додаларда 1-орын алып жүрген Айсұлу Ғалымбек, қазақша күрестен Республикалық жарыс жүлдегері Айбек Төлеухан, футболдан облыстық команда құрамында ойнайтын Жомарт Хамидоллаев, облыстық бокс жарыстарының жүлдегерлері Арман Қойбағар және Юнус Рақымжан сынды жас спортшыларымыз жеткілікті.

Шәкірттеріміздің осы нәтижелері отбасындағы ата-аналардың қолдауы мен тынымсыз еңбектің арқасында деп бағалауға болады. Осындай мектеп пен отбасы бірлігін нығайта түсер игілікті іс-шаралар көп болғай.

Қадыргүл АЛИМГАЗИНА,
М.Әуезов атындағы
№5 ЖББ мектеп
директордың тәрбие ісі
жөніндегі орынбасары,
Арқалық қаласы