Шәкірттердің мерейі үстем

Мамандардың пайымдауынша, кез келген баланың бойында бұғып жатқан талант пен дарын болады. Тек оны дер кезінде ашып, дұрыс бағыт-бағдар беру керек. Ерте жастан өз ерекшелігін, бойындағы дарынын көрсете білген ұлдар мен қыздар да жетіп артылады.

Солардың бірі – Қостанай қаласындағы Абай атындағы ЖББ мектебінің 5-сынып оқушылары – Арсен Жұмабек пен Саида Абилова. Үстіміздегі жылдың ақпан айында «Достық» білім беру орталығының ұйымдастыруымен өткен олимпиада нәтижесінде қалалық кезеңге өтіп, «Достық» білім беру орталығының базасында қала мектептері арасындағы оқушылармен сайысқа түскен болатын.
Олимпиада қорытындысы бойынша Саида Абилова – логика, математика, ағылшын тілінен 3 жүлделі орынға ие болып, Арсен Жұмабек – логика, математика, ағылшын тілінен 1 жүлделі орынға ие болды. Бұл – көптен күткен олимпиадалық көрсеткіш болды. Екі оқушымыз да үздіктер қатарынан табылды. «Мені жеңімпаз деп жариялаған кезде, қатты қуандым. Ешқашан өзімді бүгінгідей сезінген емеспін», – деп Арсен өзінің сезімін жеткізді. Саида болса: «Тегімді естігенде өте қуандым. Өзіммен мақтанамын!», – деп жауап берді. Мектеп әкімшілігінің атынан «Достық» білім беру орталығының жетекшісі Н.Торғаев оқушыларға білім додасындағы сәтті уақыт сыйлағандары үшін үлкен алғыс білдіреміз.
Оқушыларымыз сертификатпен бірге бағалы сыйлық та алды. Сонымен қатар, пәндік жоғары көрсеткіштері үшін мектебіміздің математика пәнінің мұғалімі А.Султангазинді және ағылшын тілі пәндерінің мұғалімі – Н.Панько мен Д.Утегенованы атап өткіміз келіп отыр. Әрине, бала тәрбиесінде ата-аналардың тәрбиесі зор. Арсен, Саида секілді еліміздің болашақ ұрпақтарына жақсы тәрбие беріп отырғандары үшін ата-аналарына үлкен алғыс білдіреміз.
 

Келбет МУРЗАБЕКОВА,
Абай атындағы ЖББМ
директорының оқу ісі
жөніндегі орынбасары,
қазақ тілі мен әдебиеті
пәнінің мұғалімі,
Қостанай қаласы