«Шоқаны бар ел – шоқтығы биік ел»

Ш.Уәлиханов атындағы №1 орта мектепте осындай тақырыпта даланың дана дарыны Шоқан Шыңғысұлы Уәлихановтың 185 жылдығына орай облыстық деңгейде ғылыми-тәжірибелік конференция өтті.

Шоқан Уәлиханов – қазақ халқының тұңғыш ғалымы, терең ойлы, асқан зейінді ағартушы. Ол – ғылымның әр тарапынан білімі бар ұлы ғалым, ағатушы, саяхатшы, зерттеуші, тарихшы, географ, этнограф әрі кәсіби суретші. Шоқан халықты жүрекпен барынша сүйе білді. Замандастарының қайғы-мұңына ортақтасты, қуанышына сүйсінді, жамандықтан жирендірді. Шоқанның осынау кісілікке толы ұлы гуманизмі, мәңгі суымас жалынды сезімі кім-кімді де таңғалдырмай қоймайды. Оның сәулелі ойлары әлемнің түкпір-түкпіріне тарап, тарих белестерінде сыннан өтіп, әлемдік талғам-танымда жоғары деңгейде мойындалды.
Мектебімізде ұйымдастырылған конференция ғалымның қайталанбас өмірін кейінгі ұрпаққа үлгі ету, тұлғаның ерен еңбегін, асыл мұраларының құндылықтарын бүгінгі және болашақты жалғастырушы жас ұрпақ тәрбиесінің қайнар көзіне айналдыру, білім алушыларды елжандылыққа, азаматтыққа, отансүйгіштікке, өлкені тани білуге тәрбиелеу мақсатын көздеді. Арқалық қалалық білім бөлімінің әдістемелік кабинет меңгерушісі Елена Сысоева ұйымдастыруға ат салысқан конференция қазіргі жағдайға байланысты қашықтан, яғни онлайн форматта өтті.

Онлайн жиынға Ы.Алтынсарин атындағы Арқалық педагогикалық институтының аға оқытушылары, магистрлері, Нұр-Сұлтан қаласындағы «Тұран» колледжі, №53 мектеп-лицейі, №83 гимназия, №78 мектеп, №71 «Мөлдір» балабақшасы, Н.Құлжанова атындағы Торғай гуманитарлық колледжі, Қостанай облысы Ш.Уәлиханов атындағы Әулиекөл ОМ, Торғай, Жангелдин мұражай кешенінің басшысы, Жарқайың ауданындағы Ш.Уәлиханов ОМ, Ш.Уәлиханов атындағы Торғай ОМ, Ы.Алтынсарин атындағы Амангелді ЖОББМ, «Жасбуын» ОМ, Ы.Алтынсарин атындағы гимназия, А.Байтұрсынов атындағы бастауыш гимназия, №3, 5, 6, 10, Родина ЖОББМ ұстаздары мен оқушылары қатысты.

Ең алдымен, пленарлық отырыс өткізілді. Модератор мектебіміздің директоры Күлнәзия Мұқашева конференцияны құттықтау сөзімен ашып, жүргізіп отырды. Әрі қарай секциялар өз жұмыстарын жалғастырды. Конференция үш бағыт бойынша өтіп, барлығы 100-ге тарта материалдар келіп түсті. Басқосу үш бағытта жүргізілді: 1. Ш.Уәлихановтың өмірі мен мұрасы. 2. Ш.Уәлиханов сан қырлы дарын иесі. 3. Шоқанның қызметін зерттеу бойынша мектеп оқушыларының ғылыми қоғамының жұмысын бейнероликтермен, бейнежазбалар, слайдтар арқылы көрсету.

Қатысушылар Ш.Уәлихановтың өмірі мен мұрасын, қызметін зерттеуде жеке және кәсіби түрде тәжірибе алмаса отырып, талқылау үшін диалог алаңын құрды, теориялық білімді ғылыммен, тәжірибемен байланыстырды. Конференция барысында Шоқанның сан-қырлы дарын иесі екендігін толықтай ашып берді. Бұған тақырып етіп алып отырған «Шоқаны бар ел – шоқтығы биік ел» деген Ғабит Мүсіреповтің сөзі толығымен дәлел бола алады. Алқалы жиын соңында барлық қатысушылар Алғыс хаттармен, дипломдармен марапатталып, сертификаттарға ие болды.

Сәуле КЕНЖЕҒАЛИЕВА,
Ш.Уәлиханов атындағы
№1 ЖОББМ физика пәнінің
мұғалімі және мұражай жетекшісі,
Арқалық қаласы