«Сырлы жеңге, сұлу қыз»

Осындай тақырыпта Қостанай ауданына қарасты Озерный негізгі орта мектебінде қазақ қыздарына тән инабаттылық, имандылық пен әдептілікке тәрбиелейтін, ұлттық салт-дәстүрді қадірлеуге үндейтін сайыс өтті.

Қыз баланы оң босағаға отырғызып қадірлеген қазақ халқы, үйіне келіп түскен келінді табалдырықтан оң аяғымен аттандырған. «Қызым саған айтам, келінім сен тыңда» деп, келінді өз отбасына ыңғайлап тәрбиелей отырып, бүгінгі қыз – ертең бір отбасына келін боларын білген дана халық қыз баласының жеңгесімен жараса жүруін қалаған. Есімдерін тура айтпай әдемі ат қойып, жеңгелері де қайынсіңлілеріне өздерінің бар білгендерін үйрете білген. Сондай жеңге мен қайынсіңілі арасындағы нәзік те берік байланыстың бүгінгі күнгі көрінісі – осы сайыстың басты мақсаты.
Асылтас жеңгесімен 7-сынып оқушысы Назым Салыкова – «Еркемай», Салтанат жеңгесімен 6-сынып оқушысы Айзада Сүндетбай – «Айнамкөз», Гаухар жеңгесімен 8-сынып оқушысы Еркежан Бекболат – «Сырғалым» жұбы болып қатысты. Мектеп директорының тәрбие ісі меңгерушісі Самал Сайдильдинаның жетекшілігімен өткен бұл сайыс бес бөлімнен тұрды. Әділ баға беріп, төрелігін айтар әділ қазылар алқасы да сайланды. Бірінші «Сәлем – сөздің анасы» кезеңінде қатысушылар өздерін таныстырып өтті.
Артынша ару жеңгелер сайыстың келесі кезеңдерінде қайынсіңлілеріне ас мәзірін жасауды үйретіп, оны көрерменге ұсына білді. Өнерлерін ортаға салып, ән де шырқады, салт-дәстүрден көрініс те көрсетті. Сұрақ-жауап сайысынан да мүдірмей өтті. Биылғы оқу жылында енгізілген «Біртұтас тәрбие бағдарламасы» аясында жастардың бойында ұлттық құндылықтар негізінде ұлттық сананы қалыптастыру мақсатындағы сайыс өз деңгейінде ұйымдастырылды.

«Жүйріктен жүйрік озар жарысқанда» демекші, сайыс болған жеңіс те, жеңіліс те бар. Осы сайыста сынға түскен аруларымыз бен жеңгелеріміздің бәрі де ақылына көркі сай, білімді де өнерлі екенін байқатты. Дегенмен қарсыластарынан оза шауып, Асылтас жеңгесі мен Назым Салыкованың «Еркемай» жұбы І орынды қанжығасына байлады.
Бүгінгі жастарды тәрбиелеу, әлеуметтік тұрғыдан барынша қамтамасыз ету, толыққанды білім алуына жағдай жасау, олардың құқықтары мен заңды мүдделерін қорғау – ұлттық саясатының басым бағыттарының бірі екені сөзсіз. Тәрбие мен оқыту – бір бірінен бөліп қарауға келмейтін процесс. Мектептегі тәрбие сынып сағаттары мен сыныптан тыс қосымша білім беру жұмыстары арқылы жүзеге асатыны анық. Ендеше, ұлттығымызды дәріптейтін осындай құнды дүниелер көп болғай.
 

Жумабике НУРСЕИТОВА,
Озерный негізгі орта
мектебінің директоры,
Қостанай ауданы