Тағылымға толы патриоттық кеш

Әулиекөл ауданындағы №1 Құсмұрын жалпы білім беретін мектебінде «Жас сақшы» әскери-патриоттық жобасы аясында 7–11-сыныптар арасында «Туға түзел!» тақырыбында патриоттық тағылымы мол кеш өтті.

Кеш қонағы – Құсмұрын станциясы жол полициясы бөлімі бастығы, полиция майоры Елукенов Ерлан мырза қазылар сапында оқушылардың Қазақстан Республикасының көк туын енгізу, саптық алып жүру, кезекті алмасу мен шығару сәтіне дейін әділ бағалады. Тынымсыз еңбек пен бұлжымас әскери тәртіптің үлгісін паш еткен болашақ Отан қорғаушыларымыз берілген тапсырмаларды жүйелі, нақты орындап, көрермендер ықыласына бөленді. Оқушылардың мемлекеттік рәмізге деген шексіз құрметі мен Отан алдындағы жауапкершілікті, отаншылдық парызды түсінуіне маңыз берілді.

Оқушылардың саптық даярлығында әскери киім мен темірдей тәртіпті игеруге үлес қосқан ұйымдастырушылар алқасы кештің тағылымды өтілуіне жауапкершілікпен жұмыс істеді. Кеш соңында болашақ Отан қорғаушыларымыз бен жас сақшыларымыздың бағдарламалық сайыс нәтижесінде барлық бағдарламаларды аса жоғары деңгейде өткізген 11 «А» сынып оқушылары Бас жүлдеге ие болса, жүлделі 1-орын 9 «А» сынып оқушыларына, 2-орын 10 «Ә» сыныбының қырандарына, ал 3-орын 8 «А» сыныбының даярлықпен келген тобына бұйырды.

Жүлделі орындармен қатар төрт номинация бойынша төрт оқушы марапатталды. «Үздік командир» – 9 «А» сынып оқушысы Ураз Аңсаған, «Үздік киім үлгісі» – 7 «А» сынып оқушылары, «Креативті тұлға» – 11 «А» сынып оқушысы Мұхаммед Абдығалым, «Үздік ту ұстаушы» аталымына 10 «А» сынып оқушысы Дильназ Сапарбекова ие болды. Қатысқан сынып топтарына белсенді атсалысқаны үшін Алғыс хаттар ұсынылды.

Мұхамедияр БЕЙСЕНБИН,
№1 Құсмұрын жалпы білім беретін мектебінің
АӘжТД пәнінің мұғалімі,
Мариям НУРКАНОВА,
қазақ тілі мен әдебиеті пәнінің мұғалімі,
Әулиекөл ауданы