Тарихты ұмытпау – ұрпаққа парыз

Ұрпақтың санасында мәңгі қалған есімдердің бірі – Кейкі батыр. Елі үшін құрбан болған батырды дәріптеу мақсатында Арқалық қаласындағы Кейкі батыр атындағы №4 ЖББ мектебінде «Кейкі батыр: тағдыры, тарихы, тағылымы» атты семинар өткізілді.

«Тарихын білмеген елдің – болашағы бұлыңғыр» демекші, өз елінің тарихын білу – болашақ ұрпақтың парызы. Облыстық білім басқармасының жоспарына сәйкес өткізілген семинарға Кейкі батыр туралы кітаптардың авторы, кейкітанушы Шөптібай Байділдаұлы, өлкетанушы, Торғай мұражай кешенінің директоры Гүлбану Сәрсекеева, сонымен қатар ақын, Арқалық педагогикалық институтындағы филилогия факультетінің деканы Айбек Қалиев шақырылды.

Тарих пәнінің мұғалімдері С.Бекентаев пен Ж.Амандыкова 8-сыныптарға «Қазақтандағы ұлт-азаттық күрестері» тақырыбы бойынша сабақтар және 9-сыныпта орыс тілі мен әдебиеті пәнінің мұғалімі Э.Төлегенова және 2-сыныпта бастауыш пәнінің мұғалімі Ж.Ибраева сыныптан тыс іс-шараларын жоғары деңгейде өткізді. Семинар «Елі үшін туған ер Кейкі» тақырыбындағы концерттік бағдарламамен аяқталды. Концертте Кейкі батырға арналған сахналық қойылым қойылды. Патриоттық сезімдегі әндер шырқалып, келген қонақтар жақсы әсерде болды.

Семинардан соң Кейкі батыр кесенесіне барып, батырдың рухына құран бағышталды. Кейкітанушы Шөптібай Байділдаұлы келген қонақтарға кесененің салыну тарихы мен батырдың өмір жолындағы беймәлім тұстар жайлы айтып, тағылымды әңгіме өрбітті. Семинарға келген қонақтар тарихи деректерге қанық болып, ұйымдастырушыларға алғыстарын білдіріп кетті.

Сұнғат БЕКЕНТАЕВ,
Кейкі батыр атындағы
№4 ЖББ мектебі
директорының тәрбие ісі
жөніндегі орынбасары,
Арқалық қаласы