Тартысқа толы бәсеке

Тәуелсіздіктің 30 жылдығы мен Денсаулық күні қарсаңында мектебімдің 4-сынып оқушылары арасында жас ұрпақтың спортқа деген қызығушылығын арттырып, оларды саламатты өмір салтына баулу мақсатында тартысты сайыс ұйымдастырылды.

Сайыс бірнеше қызықты кезеңдерден тұрды. Атап өтер болсақ: кедергілер арасымен допты соғып келу, ракеткамен шағын допты қағып алып келу, секіртпемен секірту, допты жоғарыдан беру сияқты сайыстардан құралды. Жалпы сайысқа бес сыныптан құралған бес команда қатысты. Олар: 4 «А» сыныбының «Қыран» командасы, 4 «Ә» сыныбының «Сұңқар» командасы, 4«Б» сыныбының «Жалын» командасы, 4 «В» сыныбының «Тұлпар» және 4 «Г» сыныбының «Болашақ» тобы.

Жарысқа оқушылар белсене қатысып, жеңіске жету жолында барын салды. Алайда жеңіс бар жерде жеңіліс те бар. Тартысты да қызықты ойында топтар мынандай орындарға ие болды: мықтылар арасынан үздік шығып, 3-орынға «Сұңқар» тобы, 2-орынға «Қыран» командасы ие болды. Ал бәрінен оқ бойы озық шығып, 1-орынды «Жалын» командасы қанжығасына байлады. Жеңімпаздар мақтау қағаздарымен марапатталды. Жарыс оқушыларды бір ортақ мақсатқа жұмыла білуге, ұйымшылдыққа баулып, таза ауада дем алып, денсаулықтарын жақсартуға ықпал етеді.

Али АЛТЫНБЕКОВ,
Бейімбет Майлин атындағы
№7 мектеп-гимназиясының
дене шынықтыру мұғалімі,
Рудный қаласы