Тартысқа толы сайыс

Тәуелсіздіктің 30 жылдығына орай Рудный қаласындағы №18 орта мектепте дене шынықтыру пәнінің мұғалімдері балалар ісінің ұйымдастырушысымен бірлесе волейболдан ұстаздар мен ата-аналар және оқушылар арасында тартысты әрі қызықты сайыс өткізді.

Аталмыш спорттық іс-шараның мақсаты – білім алушылар мен педагогикалық ұжымының бос уақытын тиімді ұйымдастыру және мектеп пен ата-аналар қауымдастығы арасындағы байланысты нығайту. Сонымен қатар саламатты өмір салтын ұстану мен спорттың ең таңдаулы түрі волейболға қызығушылықты арттыруды көздеді. Жарыс арнайы бағдарлама бойынша айналмалы шеңбер түрінде өткізілді.

Тартысты бәсекеде жүлделі үшінші орынды ата-аналардан құралған команда місе тұтса, екінші орынды спортқа бейім ұстаздар алды. Ал бас жүлдені тамаша ойын өрнегін көрсеткен талапты да талантты оқушылар командасы иеленді. Ойын қатысушылары ұйымдастырушылар тарапынан арнайы кубоктар мен Алғыс хаттармен марапатталды. Тәуелсіздікке тарту ретінде жоспарланған тартысты сайыс өз мәресіне жетті.

Руслан ШАКЕНОВ,
№18 ОМ дене шынықтыру
пәнінің мұғалімі,
Рудный қаласы