Тәуелсіздігіміздің айрықша белгісі

Выпуск - №47 (443) : 27.11.2020

224

Жыл сайын елімізде қараша айының 15-інде ұлттық валютамыз Теңге күні атап өтіледі. Айтулы датаға орай Айсары орта мектебінің кітапханасында мерекелік іс-шара болып өтті.

Мектебіміздің кітапхана меңгерушісі Мейрамкүл Көшек «Рухани жаңғыру» жобасын іске асыру мақсатында оқушылардың еліне, жеріне деген сүйіспеншілігін, отаншылдығын, адамгершілігін, халқымыздың қилы тарихын, әдет-ғұрпын, салт-дәстүрін, мәдени мұраларын түсіне білуіне басты назар аударып ақын, жазушылар, мереке, атаулы күндер жайында кітаптар көрмесін ұйымдастырып, тәрбие жұмыстарын жиі өткізіп тұрады. Ол кісінің жұмысына мығым, ұқыпты әрі қашанда ізденіс үстінде жүретінін атап өткен артық болмас. Бұл ісіне ата-аналар, ұстаздар қауымы және оқушылар да дән риза.

Жуырда 5 «Б» сынып оқушыларының қатысуымен Теңге күніне орай ұйымдастырған мерекеде теңгеміздің шығу тарихы жайында қажетті мәліметтер айтылып, қызықты логикалық сұрақтар қойылды. Мектебіміздің оқушысы Қарақат Тойшыбек үш тілде жүректі тебірентер өлеңін оқыды. Өздерінің туындылары мен өлең, тақпақтарын керемет орындағандар – Аяулым Мұңлыбек, Аружан Қадамбаева, Хадия Изтелеуова, Руслан Каблашев, Гүлімай Сарова, Санжар Қайдар, Жаннұр Нұржанқызы болса, сұрақтарға тез жауап бергендер – Темірлан Әлімжан, Бибарыс Жарасланұлы, Аян Жұмағали, Томирис Болысбекқызы, Ақниет Сырғабаева, Ислам Салмағамбетов болды.

Ең белсенді де тапқыр оқушыларға мақтау қағаздары табыс етілді. Мереке соңында кешті ұйымдастырушы М.Көшек және мерекеге белсене қатысқан 5-сынып оқушыларына мектеп әкімшілігі атынан алғыс білдірілді.

Дариға БЕРСҮГІРОВА,
Айсары ОМ қазақ тілі мен
әдебиеті пәнінің мұғалімі,
Қостанай ауданы