Тәуелсіздіктің еркін ұрпақтары

Биыл Тәуелсіздігіміздің 30 жылдығы. Мерейлі датаға орай ел көлемінде егемендікті ұлықтаған шаралар ұйымдастырылуда. Қостанай қаласындағы Ы.Алтынсарин атындағы мамандандырылған мектеп-интернаттың қабырғасында да игілікті шара жалғасын тапты.

Бұл жолы ұлт ұстазы Ыбырай Алтынсариннің есімін иеленген білім ордасының оқушылары өңіріміздің мақтаныштары, халықаралық байқаулардың жүлдегерлері Абылай Мауданов, Жандос Жүсіпбек, Айжан Санаймен әдеби-тағылымдық кездесуге қатысты. «Азат елдің арманы асқақ жастары!» тақырыбындағы тағылымды жиын барысында өскелең ұрпақ пен жас буын арасында сұрақ-жауап форматындағы әңгіме өрбіді. Мектеп оқушылары қонақтарға өздерін қызықтырған сұрақтарын қойып, оған тұшымды жауаптарын да ала білді.

Кездесу барысында оқушыларға да сөз беріліп, олар Тәуелсіздікке арнап жазған өлең жолдарын тебірене оқыды. Іс-шараның ұйымдастырушысы Салтанат Өтелбаеваның айтуынша, бұл кездесуді өткізудегі басты мақсат – жастарға егемендіктің қадір-қасиетін ұғындыру арқылы болашақтың қандай болмағы өздеріне байланысты екендігін жеткізу. Білім ордасындағы жас ақындар үйірмесінің жетекшісі Салтанат Амантайқызы қазіргі зайырлы қоғамда адамның рухани байлығы, ішкі жан дүниесінің кемелдігі бізге аса қажет екендігін айтады.

Іс-шара барысында Абылай Мауданов пен Жандос Жүсіпбек Тәуелсіздікке, туған жерге қатысты өлең жолдарын оқып, жүргізушінің «Қазіргі заманның жастары қандай болуы керек?» деген сұрағына қатысты ой өрбітсе, облыстық филармонияның әншісі Айжан Санай домбырамен әуелете ән шырқап, кештің шырайын келтірді. Қонақтар өз сөзінде жиналған жастарға ақыл-кеңестерін де айтып өтті.

Жамал ШАУКЕН