Тіл – ұлттың жаны

Шыр етіп жарық дүние есігін ашқаннан бастап, әр адам ана тілін құлағына сіңіріп өседі. «Тіл – ақылдың өлшемі, ұлттың жаны», – деген Ахмет Байтұрсынұлының сөзіне сүйенер болсақ, елдің елдігін де, бірлігін де айқындайтын тіл екендігі белгілі.

Қазақ, орыс, ағылшын тілдерін жетік меңгеруге бағытталған үштұғырлы тіл саясаты – елдігіміз бен бірлігіміздің тірегі деуге болады. Тілдердің үштұғырлығы саясатының астарында ел азаматтарының мемлекеттік тілді білуі ғана емес, өркениетті елдермен тереземіз тең болу үшін басқа тілдерді де меңгеру міндеті тұрғанын білеміз. Тілдер күні мерекесіне орай Абай негізгі орта мектебінің 7-сынып оқушыларының арасында «Тіл – ұлттың жаны» атты дөңгелек үстел өтті.

Оқушылардың ана тіліне деген құрмет сезімін арттыру, тіл мәртебесін көтеру, таза сөйлеуге үйрету, ұлтына, еліне деген сүйіспеншілігін ояту мақсатындағы кеш өз мақсатына жетті деп ойлаймын. Іс-шара барысында ана тіл тұғырының мықты болуына негіз қалаған бабаларымыздың өсиетін ұран ету, қазақ тілінің мәртебесін көтеру де, елімізде тұратын барлық халықтардың тілдерін құрметтеу де назардан тыс қалмады. Білім алушылар тіліміздің мәртебесі туралы, ертеңі мен болашағы жайлы сөз қозғап, ақындарымыздың өлеңдерін оқыды.

«Ахмет Байтұрсынұлы – қазақ тіл білімінің атасы», «Латын әліпбиінің негізін қалаушы» деген тақырыпта балалар пікір алмасып, өз ойларын ортаға салды. «Тілі жоғалған жұрттың өзі де жоғалады», – дейді Ахмет Байтұрсынұлы. Бүгінгі заманда тіліміз бәсекеге қабілетті болу үшін өзіміз сөйлеп қана қоймай, техника тілін де қазақша сөйлетуіміз керек.

Әйгерім ӘМІРОВА,
Абай негізгі орта мектебінің
қазақ тілі мен әдебиеті
пәнінің мұғалімі,
Қостанай ауданы