Волейбол турнирі

Тәуелсіздік күніне орай, мектеп парламентінің ұйымдастыруымен мектебімізде 9–11-сыныптар арасында волейболдан турнир өтті. Бұл іс-шараға белсенді, спортқа құштар оқушылар қатысып, өз шеберліктерін және командалық рухын көрсете білді.

Турнир нағыз достық пен спорт мерекесіне айналды. Ынтымақтастық ортаны қалыптастыра отырып, қатысушылар өздерінің ойын шеберлігін ғана емес, қарсыластарына деген құрметін де көрсетті. Ал, жанкүйерлер командаларын қолдап, ерекше атмосфера қалыптастырды. Ойындар тартысқа толы болып, оқушылар жарқын сәттер мен қызықты оқиғалардың куәсі болды. Волейбол алаңындағы жарыс нәтижесінде 11 «Б» сыныбы бірінші орынды иеленсе, 11 «А» сыныбы екінші орынға ие болды, ал 10 «В» сыныбы үшінші тұғырға табан тіреді.

Осылайша, жеңімпаздар жоғары дайындықтары мен ұйымшылдықтарын дәлелдеді. Айтқандай, турнир жоғары деңгейде ұйымдастырылып, әр кезеңі мұқият дайындалды. Мектеп парламенті жарыс кестесін жасап, жеңімпаздарды марапаттауға дейінгі барлық ұйымдастыру мәселелерін толықтай қарастырды. Әсіресе, саламаттылықты насихаттауға бағытталған спорттық іс-шараның жоғары деңгейде өтуіне үлес қосқан барлық жандарға ерекше алғыс білдіреміз.

Маржан СУНКАРБЕКОВНА,
Абай атындағы ЖББМ аға тәлімгері,
Қостанай қаласы