Халық мәдениетінің коды

Выпуск - №35(583) : 19.09.2023

636

Қостанай қаласындағы «Строительный» кітапхана-филиалының қызметкерлері №28 мектеп-гимназиясының 5 «Б» сыныбының кадеттеріне арнап «Тіл – халық мәдениетінің коды» атты іс-шара өткізді.

Кітапханашы іс-шара барысында 1989 жылы қабылданған Қазақстан Республикасындағы «Тіл туралы» Заңының тарихымен таныстырды. Елімізде қазақ тілі – мемлекеттік тіл болып танылса, орыс тілі – ұлтаралық қарым-қатынас тілі саналады. Мәселен, биылғы 2023 жыл ТМД елдерінде ұлтаралық қатынас тілі ретінде орыс тілі жылы болып жарияланғаны белгілі. Әңгімелесу аясында балаларды заңның талаптарымен таныстырып қана қоймай, әрбір тілдің олардың өміріндегі рөлі қандай екенін сұрап-білдік.

Балалар «Қарым-қатынас тілін біл» виктоинасына, жұмбақ сайысына белсенді қатысты. Сондай-ақ өткізілген «Қызықты ұйқастар» ойыны балалардың қазақ және орыс тілдерін қандай деңгейде меңгергенін көрсетті. Ал «Тіл құдіреті» атты кітап көрмесіне: тілашар, сөздіктер, тіл танымына арналған әдебиеттер қойылды. Ұйымдастырылған ойындарға қатыса отырып, жас жеткіншектер Қазақстан атты бір шаңырақ астында түрлі этнос өкілдерінің өмір сүріп жатқанын және де бұл достық атмосфераның тілге деген құрметпен тікелей байланысты екенін түсініп, өз білімдерімен көрсете білді.

Сандуғаш ОМАРОВА,
«Строительный» к/ф
кітапханашысы,
Қостанай қаласы