Үкілеген үміттерді арқалаған түлектер

Еліміздің барлық білім ұяларында күміс қоңыраудың сыңғыры естіліп, жұртшылық мектеп түлектеріне сәт сапар тіледі. Осы орайда, Амангелді ауданындағы Б.Қолдасбаев атындағы ЖББ мектепте «Мектебім, саған мың алғыс» атты салтанатты жиын болып өтті.

Жиынға Амангелді ауданының білім бөлімінің басшысы Дихамбаев Мұрат Сембайұлы, білім бөлімінің әдіскері Бимағамбетова Бақыткүл Әмірғалиқызы, ата-аналар, ұстазадар мен оқушылар қатысты. Бұл – 11 жыл бойы тәлім-тәрбие берген ұстаздар мен ата-аналардың еңбегінің жемісі болып саналатын жас түлектердің мектеп қабырғасын артта қалдырып, үлкен өмірге қадам басатын қуанышты күн. Сапалы білім мен саналы тәрбие алған алтын ұя мектебін тәмамдап, қияға қанат қағатын жастар үшін, бұл – ең қымбат, ең қимас әрі ең ұмытылмас жүрек тебірентерлік сәттердің бірі.

Алматы қаласындағы университеттің грантын жеңіп алған Хамида Искакова

Биыл үш сынып Б.Қолдасбаев атындағы ЖББ мектебінің түлегі атанды. Атап айтар болсақ: сынып жетекшісі Макашева Данара Ерболатқызы болған 11 «А» сынып оқушылары, сынып жетекшісі Жақыбаева Гүлім Ғалымжанқызы болған 11 «Б» сынып оқушылары және сынып жетекшісі Мыстанова Әлия Валентинқызы болған 11 «В» сынып оқушылары. Өмірдің жаңа белесіне үлкен үмітпен қадам басқалы тұрған түлектерге жиналғандар ұлы мұраттар жолына шеккен сапарлары сәтті, қадамдары құтты болуын тіледі.

Ғибрат Меңдібаевқа Амангелді ауданы білім саласына қосқан айрықша үлесі үшін алғыс хат табысталды

Құттықтау сөз Амангелді ауданы білім бөлімінің басшысы Дихамбаев Мұрат Сембайұлына, мектеп басшысы Әбдіков Мұхаммедали Серікұлына беріліп, олар барша білім алушыларды мерекесімен құттықтап, мектеп түлектердің алдағы өмірлеріне ақ жол тіледі. Түлектер сынып жетекшілеріне гүл шоқтарын ұсынып, алғыстарын айтса, ұстаздары 11 жыл бойы білім беріп, бозбала мен бойжеткендер қатарына бет алған шәкірттеріне армандарына талмай жетуін тілеп, қимай қоштасатындарын тілге тиек етті.
Облыстық, Республикалық деңгейдегі ғылыми жоба және пән олимпиадалардың жеңімпазы, жақында өткен Республикалық «Жарқын болашақ» қазақ тілі пән олимпиадасының шешуші кезеңінің «Білгірлер бәйгесі» аталымынан ІІ орын алып, Алматы қаласындағы университеттің грантын жеңіп алған 11-сынып оқушысы Хамида Искакова 10-сынып оқушысы, оқу озаты, аудандық «Әбіш оқулары» байқауының, ғылыми жобалардың жеңімпазы, аудандық, облыстық олимпиадалардың қатысушысы Жасмин Сайлауоваға берік қалыптасқан дәстүрге сай білімнің алтын кілтін тапсырды.

«Армандастар» балалар шығармашылығы облыстық фестивалінің обылыстық және аудандық кезеңдерінің «Кейіпті актерлік тұрғыдан ең үздік бейнеулеу» номинациясының иегері, «Қазақстан балалары шексіз әлемде» атты облыстық кино байқауының І орын иегері, «Іляс Жансүгіров оқулары» байқауының облыстық кезеңінің жеңімпазы, «Ұлт ұстазы Ахмет» атты мәнерлеп оқу байқауының І орын иегері әрі мектеп мақтанышы Ғибрат Меңдібаев «Соңғы қоңырау» монологын оқыды. Оқушылар тақырыпқа сай әндерін шырқап, би биледі. Соңында Ахмедия атамыз мектеп бітіруші түлектерге ақ батасын берді. Осылайша, үкілеген үміттерге толы шара Саят Әбеновтың сөзіне жазылған Нұрлыбек Есмағамбетовтің әні «Қолдасбаев мектебім» атты мектеп әнұранымен аяқталды.

Әнет ЖҰМАБЕК,
Б.Қолдасбаев атындағы ЖББ мектебі,
Амангелді ауданы