Үлкен арманға бастар айтулы қадам

Білім ордасынан ұшар сәт мектеп бітіруші түлектердің жүрегіне қуаныш-шаттығымен қоса шексіз қимастық сезімін сыйлайды. Олар үшін мектеп қабырғасында соғылған соңғы қоңырау үні биыл ерек.

Республикамыздың барлық мектептерде бір уақытта, яғни маусым айының 3-і күні таңғы сағат 10-да түлектердің қолына орта білім туралы аттестаттарын табыс ету рәсімі өтті. Шара небәрі 40 минутқа созылды. Қарантин жағдайына байланысты, марапаттау барысында түлектер медициналық маска тағып, белгіленген арақашықтықты сақтады. Қостанай қаласының білім бөлімі ұсынған деректерге сүйенсек, биыл 992 түлек үлкен өмірге қадам баспақ. Ал облыс орталығындағы №11 орта мектепті биыл 15 оқушы тәмәмдап, орта білім алғандығын растайтын аттестатқа ие болды.

Аталмыш мектеп ауласында өткен салтанатты шараны білім ордасының директоры Светлана Ковлющенко ашып, сөз басында үстіміздегі жылдың айтулы даталарға – Ұлы Отан соғысына 75 жыл, Абай Құнанбаевтың мерейтойы және Волонтерлер жылына сәйкес келгендігін атап өтті. Артынша алтын ұядан қанат қаққалы тұрған түлектердің қадамына сәт-сапар тілеп, алдағы ұлттық бірыңғай тестілеуден абыроймен өтетіндеріне сенім білдірді. Мектеп басшысының сөзінен кейін шәкірттерін үлкен өмірге ұшырғалы жатқан сынып жетекшісі Гаухар Абильдина жүрекжарды сөзі мен игі тілегін арнады.

Карантин талаптарына сай түлектер арнайы дайындаған билерін орындай алмаса да, ақжарма тілектерін арнап, дәстүрлі түрде шырқалатын әннен шашу шашты. Тарыдай болып кірген білім ордаларынан, тудай болып шығып жатқан олар білім нәрін кеудесіне толтырған аяулы ұстаздарына алғыс білдіріп, «Қош бол, мектебім» әнін қосылып орындады. Мектеп бітіруші түлектердің атынан сөз алған сынып белсендісі Асылжан Самуратова білімнің дәнегін сепкен ұстаздарына алғыс білдіріп, сыныптас достарына ақ жол тіледі.

Енді оларды маусымның 27-сі күні өмірінде кездесетін сынақтардың алғашқысы күтіп тұр. Биыл Қостанай қаласы бойынша ҰБТ-ға қатысуға 867 түлек өтініш берген. Оның ішінде 234-і қазақ тілінде болса, 633-і орыс тілінде. Ертеңге деген үмітін үкілеген кеудесінде жалыны бар жастарға сәттілік тілей отырып: «Жолың болсын, жас түлек!», – дейміз.

Жамал ШАУКЕН,
суретті түсірген Наурыз ТУРЕБЕК