Ұлт ұстазының ұлы мұрасы

Федоров ауданына қарасты Абай атындағы жалпы білім беретін мектепте ұлт ұстазы, қазақтың тұңғыш ағартушысы Ыбырай Алтынсариннің 180 жылдық мерейтойына арналған «Кел, балалар оқылық!» атты мәнерлеп оқу сайысы өткізілді.

Мектеп оқушыларының қатысуымен өткен мәнерлеп оқу сайысы қазақ халқына білімнің сарқылмас қазынасын қалдырған ағартушының еңбектерін насихаттау мақсатын көздеді. Ы.Алтынсариннің өлең-жырларын ақтаруға мектептің бастауыш сынып оқушыларынан бастап жоғары сынып оқушылары да белсенді қатысты. Байқаудың ашылуында қазақ тілі мен әдебиеті бірлестігінің жетекшісі Гүлзира Калиева оқушыларға жылы лебізін білдіріп, сәттілік тілеп, құттықтау сөзін арнады. Мектепішілік мәнерлеп оқу сайысына жалпы саны 30-дан астам оқушы қатысты. Олар Ыбырай атамыздың өлеңдерін барынша мәнерлеп оқып, көрермендер мен әділ қазылар алқасының жүрегіне жеткізуге тырысып бақты.

Оқушыларды сайысқа дайындау барысында мектебіміздің қазақ тілі мен әдебиеті пәнінің мұғалімдері үлкен еңбек сіңірді. Бұл тұста Г.Калиева, Ұ.Мырзалиева, А.Аканова, Ж.Абайтова, Б.Нуржанова, К.Бейбітқызы, Г.Ануарбекова, Д.Валееваны атап өтсек ләзім. Мектепішілік байқауға оқушыларды саны жағынан ғана емес, сапалылық тұрғысынан дайындаған ұстаздардың еңбегі оқушылардың өлеңді мәнерлеп, ырғаққа салып оқығандарынан-ақ көрініп тұрды.

Байқау қорытындысы бойынша қатысушылар 1, 2, 3-жүлделі орындарға ие болып, мақтау қағаздарымен марапатталды. «Жүйріктен жүйрік озар жарысқанда» демекші, 8 «А» сынып оқушысы Гюнай Гулиева, 6 «В» сынып оқушысы Карина Мартынюк, 5 «А» сынып оқушысы Павел Ничай, 5 «А» сынып оқушысы Дарья Дудко, 4 «В» сынып оқушысы Дайана Умиртаева, 3 «Б» сынып оқушысы Микаэль Мамсуров және 5 «А» сынып оқушысы Полина Зыкова байқауда топ жарды.

Ыбырай мұрасын насихаттаған байқау көздеген мақсатына жетті. Әділ қазылар алқасы да оқушылардың өнеріне ерекше баға беріп өткенін де айтып өткен жөн. Бұлақ суындай мөлдір, тұла бойға ерекше сезім сыйлайтын Ыбырай атамыздың өлеңдері жас ұрпақтың бойына білім нәрін себуге себепкер болды. Ағартушы мұрасы мектеп қабырғасында мәңгі жаңғырмақ.

Асылхан СЕЙДАХМЕТОВ,
Абай атындағы ЖББМ
қазақ тілі мен әдебиеті
пәнінің мұғалімі,
Федоров ауданы