Ұлттық құндылық ұлықталды

Елбасы «Болашаққа бағдар: рухани жаңғыру» мақаласында жаңа дәуірдің озық үлгілерін бойымызға сіңірумен қатар ұлттық кодымызды сақтауды міндеттеді. Осы мақсатта №2 Аманқарағай ОМ аудандық басқосу өтті.

Салт-дәстүрі мен тарихына ерекше мән берген елдің тұғыры биік, іргесі берік болмақ. Кез келген халықты өзінің төлтума рухани құндылықтары мен ізгі қасиеттері біріктіреді. Осы рухани құндылықтарымыз берік болып, ата-бабамыздың мыңдаған жылдар бойы ұстанып келген әдет-ғұрпына құрмет танытар болсақ, жас ұрпақ теріс ағымдар мен жат мәдениеттің жетегінде кетпесі анық. «Ұлттық құндылық – тәрбие көзі» тақырыбындағы жиын мектептің акт залынан бастау алды. Әуезді әндерін шырқап, мың бұралған биімен тамсандарған оқушыларымызға мектеп қонақтары да ризашылығын білдірді.

Мерекелік шараның келесі маңызды бөлігі шараның тақырыбымен аттас коучинг жұмысымен жалғасын тапты. Онда мектеп қонақтары төрт топқа бөлініп, халқымыздыың салт-дәстүрі мен әдеп-ғұрыптарын ұлықтайтын шараларға белсене қатысып, білген ақпараттарымен бөлісті. Ортаға шыққан шара қатысушылары нақыл сөз, өлең-жырларымен кестелеп, әрбір әдет-ғұрып пен салт-дәстүрге тереңнен тоқталды. Артынша барша қауым алдында импровизациялау қойылымдарымен таң қалдырып, өнерлерін ортаға салды.

Мерекелік шараның келесі кезеңінде қонақтарымыз қазақы нақышта жайылған дастархан басына жайғасып, ұлттық тағамдардан дәм татты. Қазақта «Алты жыл аш болсаң да, атаңның салтын ұмытпа» деген мақал бар. Бүгінгі Тәуелсіздігіміздің ақ таңы атқан шақта жас ұрпақ ұлттық құндылықтарымыз бен салт-дәстүрлерімізді заман талабына сай қолданып, ұрпақтан-ұрпаққа аманат етіп, жеткізе білсе – рухани жаңғыру тұрғысында кемелдене түсеріміз анық.

Гүлжан УТЕСОВА,
Нұргүл МОЛДАБЕКОВА,
№2 Аманқарағай ОМ
педагогтері,
Әулиекөл ауданы