Ұшқыр ойдың алаңы

ҚР Білім және ғылым министрлiгi елімізде «Ұшқыр ой алаңы» оқушылардың мәдени-білім беру жалпыұлттық дебаттық қозғалысының жобасын әзірлеп, республика көлемінде іске асыру тетіктерін қолға алуда.

Қазақстанда дебаттық қозғалысты алғаш рет Сорос-Қазақстан қоры 1996-2004 жылдары «Дебаттар» бағдарламасын жүзеге асыру арқылы дамыта бастаған-тын. Пікірсайыс алаңдарының жұмысын одан әрі жандандыру мақсатында қолға аланып отырған «Ұшқыр ой алаңы» жобасы үздік шетел және отандық тәжірибе негізінде құрылған және республикадағы дебаттық қозғалыстың мүмкіндіктерін кеңейту арқылы өскелең ұрпақтың әлеуметтенуі мен өзін-өзі дамытуының негізгі міндеттерін шешуге бағдарланған.

Білім алушылардың шешендік сөз өнері дағдыларын, позитивті, сыни тұрғыдан ойлау дағдыларын қалыптастыру, өзекті мәселелерді көпшілік алдында талқылау мәдениетін, құрылымдық сұхбат пен пікірталасты жүргізу мәдениетін дамыту мақсатында жүзеге асырылатын дебат клубтары облыстың барлық аудандарында ақпан-наурыз айларынан бастап құрылып, өз қызметін жалғастыруда. Амангелді ауданында жалпы білім беретін мектептер бойынша – 17, «Шұғыла» балалар мен жасөспірімдер шығармашылық орталығы бойынша 1 дебат клубы құрылып, жұмысын жүргізуде. Қазіргі уақытта клуб құрамына аудан көлемінде 246 оқушы қабылданып отыр.

Дебат клубы жұмысының негізгі нысаны – дебаттық турнирлер ұйымдастыру және өткізу. Турнирлер мектепішілік, аудандық, облыстық және республикалық кезеңде ұйымдастырылып келеді. Жыл ішінде «Ұшқыр ой алаңы» жобасы бойынша мектепішілік кезеңде төрт рет, ҚР Тәуелсіздігінің 30 жылдығы аясында аудандық екі дебат турнирі, облыстық кезеңде турнир екі мәрте өтті. Амантоғай жалпы білім беретін мектебіндегі «Ділмар» клубының жетекшісі Алмас Сарбозовтың жетекшілігімен облыстық кезеңге қатысқан оқушылар жүлделі І орынға ие болып, жоғары деңгейден көріне білгенін атап өтуге болады.

Жалпы пікірталас алаңдарының оқушылар үшін берер тәлімі орасан. Себебі ол жастардың шешендік сөйлеу дағдыларын дамытып, зияткерлік және шығармашылық қабілеттерін шыңдауға ықпал етеді. Ұшқыр ой алаңы жас ұрпақтың ұшқыр ой әлемін дамыта берсін деп тілейміз.

Әнет ЖҰМАБЕК,
«Шұғыла» БЖШО
көркемдік жетекшісі,
Амангелді ауданы