Ұстаз мәртебесі – мектеп мерейі

Білім беру саласында еңбек етіп жүрген ұстаздардың ісі әрдайым құрметке лайық. Осы сөзімнің айқын дәлеліндей, бастауыш сынып мұғалімі, педагогика ғ.м. Карымсакова Жаныл Серикбаевна республикалық деңгейдегі дүбірлі байқауда жүлделі ІІІ орынды иеленді.

Сәуірдің 28-і күні Алматы қаласында бастауыш сынып мұғалімдеріне арналған математика пәнінен республикалық «Математикалық регата» олимпиадасының қорытынды кезеңі өткен еді. Еліміздің түкпір-түкпірінен жиналған ең үздік педагогтердің басын қосқан бұл додада Жаныл Серикбаевна мектебіміздің атын республика көлемінде асқақтатып, жеңіс тұғырынан көрінді.

Аталған олимпиада мұғалімдердің кәсіби шеберлігі мен шығармашылық қабілетін ғана емес, заманауи білім беру әдістерін меңгеру деңгейін анықтауды мақсат етеді. Байқау барысында қатысушылар терең пәндік біліммен қатар күрделі тапсырмаларды шешудегі стандартты емес тәсілдерді қолдану, шарттарды логикалық тұрғыдан талдау, жауабын дәлелдеу және командада тиімді жұмыс істеу дағдыларын сынға салды.
Сын сағатта дараланған әріптесіміз өз ісіне адал, зор жауапкершілік иесі. Ол оқушылардың білімге деген құштарлығын арттыру мақсатында инновациялық әдіс-тәсілдерді сабақ үдерісінде тиімді пайдаланып, әр сәтті мазмұнды және қызықты ұйымдастыра білетін шебер ұстаз. Бұл жетістік Жаныл Серикбаевнаның ғана емес, білім ордасының да мерейін үстем етті. Осындай білікті де зиялы ұстаздарымыз жас ұрпаққа сапалы білім мен саналы тәрбие беріп, еліміздің жарқын болашағын қалыптастыруда маңызды рөл атқарады.

Гулмайра СУИНБЕКОВА,
Науырзым жалпы білім
беретін мектебінің директоры