Ұстаздар да бақ сынады жарыста

Тобыл қаласында «Спорт жұлдыздары» журналының редакторы Мұсағали Тасқалиевтың ұйымдастыруымен президенттік көпсайыс, тоғызқұмалақ, дойбы, стол теннисі, гір спортынан мұғалімдер арасында республикалық спартакиада өтті.

Жарысқа мұғалімдер 18-20, 21-23, 24-34, 35-39, 40-49, 50-59, +60 жас ерекшеліктері бойынша іріктеліп, Нұр-Сұлтан, Алматы, Қарағанды, Степногорск, Рудный қалаларынан және Қызылорда, Ақтөбе, Атырау, Қостанай облыстарынан қатысты. Әсіресе президенттік көпсайыс өте тартысты өтті деуге болады. Нәтижесіне тоқталар болсақ, Рудный қаласының №13 мектебінен келген Ренат Каримов 24-34 жас аралығындағы сайыста І орын алды.
Денисов ауданынан келген Александр Купаров сайыстың екі түрінен қатысып, 50-59 жас аралығында көпсайыстан және стол теннисінен ІІІ орынға ие болды. Әулиекөл ауданына қарасты Құшмұрын орта мектебінен келген Эльвира Ыбышева президенттік көпсайыста І орынға ие болса, Сарыкөл ауданына қарасты Барвинов орта мектебінен келген Нұрлан Тайжанов 75 кг салмақта гір спортынан ІІ орынға ие болды. Ал Ново-Урицк орта мектебінің атынан қатысқан Бейбіт Валиев үстел теннисінен ІІ орынды қанжығасына байлады.
Жарыс жеңімпаздары медаль, грамоталармен және «Үздік дене шынықтыру пәні мұғалімі» төс белгісімен марапатталады. Жарыстың +60 жас ерекшелігі бойынша бақ сынаған ең үлкен қатысушысы – Қарағанды қаласынан келген Ғазиз Байғабеков президенттік көпсайыста І орынға ие болды. Ақтөбе қаласынан келген жарыс төрешілері Болатбек Сағымбаев, Еркін Бақтияров және Арқалық қаласынан келген Ораз Даркенов сайыстың әділ әрі тартысты өтуіне ат салысты.

Рашит МҰХАНБЕТЖАНОВ,
Н.Наушабаев атындағы МГ
дене шынықтыру мұғалімі,
Тобыл қаласы