Ұстаздарымыздың еңбегі еленді

«Ұстаздық – ұлы іс», – деп кемеңгер жазушы М.Әуезов айтқандай, оған лайық болу – үлкен абырой, басты борышым деп есептеймін. Қазағымның, елім мен жерімнің және ана тілімнің мерейін өсіретін ұстаздық ұлағатты қызметте адал болу – абыройлы іс.

«Оқушының жетістігі – мұғалімнің жетістігі, ал мұғалімнің жетістігі жаңа әдіс-тәсілдерді тиімді қолдануында» демекші, жаңашылдықты жатсынбай қызметінде пайдаланып, өнімді нәтижеге жетіп жүрген ұстаздарымыз баршылық. Жақында мектебіміздің тарих пәнінің мұғалімі Нурфайлов Еркебұлан Бақытұлы Қостанай облысы білім және ғылым ұйымдары қызметкерлерінің жергілікті кәсіптік одағы қоғамдық бірлестігінің Құрмет грамотасымен, ал қазақ тілі пәнінің мұғалімі Рахымжанова Жұлдызай Мұхтарқызы Қостанай ауданының өскелең ұрпағын оқыту және тәрбиелеуге қосқан үлесі үшін мадақтау қағазымен марапатталды.

Жұлдызай Мұхтарқызы – педагогикалық қызметте жиырма екі жыл еңбек өтілі бар, білікті де тәжірибелі ұстаз. Оқушылары білім көкжиегінде биіктерден көрініп, аудан, облыс, республикалық байқауларға қатысып келеді. Ал Еркебұлан Бақытұлының тарих пәнінің мұғалімі болып қызмет атқарып келе жатқанына алты жыл болса да, көптеген оқушылары білім шыңдарынан көрініп жүрген білікті маман. Екеуі де еңбегімен құрметке бөленіп жүрген педагогтер.

Елбасы Н.Назарбаев бір сөзінде: «Болашақта еңбек етіп, өмір сүретіндер – бүгінгі мектеп оқушылары, мұғалім оларды қалай тәрбиелесе, Қазақстан сол деңгейде болады. Сондықтан ұстазға жүктелетін міндет ауыр», – деген еді. Бұл сөзінен шәкірт санасына білім нәрін сеуіп, ел болашағының өрендерін тәрбиелейтін ұстаздардың жауапкершілігі жоғары екенін аңғаруға болады. Біз де өз тарапымыздан әріптестерімізді құттықтаймыз. Алдағы уақытта да биік белестерден көріне берулеріне тілектеспіз.

Қаламқас ДУЛЫБАЕВА,
Мемлекеттік тілде оқытатын
Заречный ОМ математика
пәнінің мұғалімі,
Қостанай ауданы