Жаңа кітаптар оқырман игілігіне

Кітап – рухани байлығымыз әрі білім теңізіндегі тұсбағарымыз. Бұлай деуімнің себебі, ғаламның бар құпиясы сонда сақтаулы. Ұлттық болмысымыз бен тарихымызды, салт-дәстүрімізді сүйіп, бойға сіңіруде кітапхана қорына қосылған жаңа кітаптардың септігі зор.

Биыл қорға 361 дана жаңа кітап түсті, олардың ішінде негізгі басымдық қазақ тіліндегі көркем әдебиеттер мен балалар әдебиетіне берілген. Атап айтсақ, Бердібек Соқпақбаев, Қадыр Мырза Әли, Ақылбек Шаяхмет сынды жазушылардың балаларға арналған әдебиеттері мен әлемдік классикалық балалар жазушылары – Ганс Христиан Андерсен, Ағайынды Гриммдер, Шарль Перроның шығармалары бар. Кітапхана қоржынына келіп түскен кітаптар оқушыларымыз бен ұстаздар қауымының назарына көрме-презентация түрінде мектептің әлеуметтік желілердегі парақшалары арқылы ұсынылды.

Қысқа мерзім ішінде балалардың ерекше назарын аударып үлгерген Раул Даһлдың «Дәни әлем чемпионы», «Матилда» шығармалары, Жефф Кеннидің «Тентек балақайдың күнделігі» комиксті романы, Отандық Khan comics баспасынан шыққан О.Жакуптың «Еркетай» шығармалары кішкентай оқырмандардың жүректерінен орын алды. Тағы да ерекшелеп айтатын кітаптар қатарына «Бір ел – бір кітап» республикалық акциясы аясында Президенттің ел тәуелсіздігінің 30 жылдығына арнап ұсынған «30 кітап – Тәуелсіздіктің 30 жылдығына» топтамасының қатарына енген әлемдік деңгейдегі кітаптар бар. Олардың ішінде: Габриэль Гарсиа Маркестің «Жүз жылдық жалғыздық», Хоссейни Халедтің «Жарқыраған мың күн» шығармалары бар.

Қашанда оқырманның сұранысына ие Мұхтар Әуезовтың «Абай жолы» роман-эпопеясы қазақ және орыс тілінде, Ілияс Есенберлиннің «Көшпенділер» тарихи роман трилогиясы, Әзілхан Нұршайықовтың «Махаббат, қызық, мол жылдар» романы, сондай-ақ Бейімбет Майлин, Жүсіпбек Аймауытов, Бердібек Соқпақбаев сынды жазушылармен қатар Джеймс Купер, Джек Лондон, Джером Сэндлердің шығармалары біздің қорымызды толықтыра түсті. Балалар әдебиеті қатары Джонатан Свифт, Марк Твен, Даниэль Дефо сынды жазушылардың шығармаларымен толықты.

Бүгінде кітап оқу үрдісі проблемаға айналғаны сонша, тіпті мемлекеттік масштабта көтерілді, бұған дәлел – өткен жылдың соңынан бастау алып, балалар мен жастардың мәдени және оқу құзыреттілігін дамытуға, отбасылық оқуды насихаттауға бағытталған «Оқитын мектеп – оқитын ұлт» жобасы. Әр кезде жаңашылдық адамның ынтасын арттырып, жігерін нығайтатыны анық. Кітапханамызға келіп түскен шығармалар оқырмандарға жаңа серпін сыйлағаны рас. Осындай игі үрдіс жалғасын тауып, кітапханалар балаға қызық болар көркем шығармалармен толықтырыла берсе құба-құп.

Арай ЕЛМҰРАТОВА,
Дм.Карбышев атындағы
№14 ЖББМ кітапханашысы,
Рудный қаласы