«Жаңа технологиялар заманындағы академиялық адалдық»

Дәл осындай тақырып аясындағы NIS-тің дәстүрлі тамыз кеңесі тамыз айының 23-27 аралығында Ақтау қаласындағы химия-биология бағытындағы Назарбаев Зияткерлік мектебінің қабырғасында өтті.

Ауқымды жиынға республикамыздағы 21 Зияткерлік, 1 Халықаралық мектептен 100-ге жуық педагог қатысты. Ал, 3500 мұғалім пленарлық отырыстар мен секциялардың жұмысын қашықтан тыңдады. Дәстүрлі іс-шараға Қостанайдағы НЗМ директоры Гульнара Дусказиева, тәрбие ісі жөніндегі директордың орынбасары Амир Ажмухамбетов және директордың оқу ісі жөніндегі орынбасары Елена Ващенко арнайы барып қатысты. Бес күнге созылған іс-шарада өткен жылғы нәтижелер мен оқушылардың үлгерімі туралы статистикалық деректер келтіріліп, әр мектептегі даму жоспарын талқыланды.

Жиында Маңғыстау облысы әкімінің орынбасары Звира Есбергенова, Білім беруді тұрақты дамыту қорының директоры Данияр Тоқтарбаев, Академиялық адалдық лигасының Жобалық кеңсесінің басшысы Нұргүл Маханбаева, Астана IT университетінің Үздіксіз білім беру сандық институтының директоры Ермек Әлімжановтар төбе көрсетті.
Кейінгі жылдары жасанды интеллектті білім саласында қолдану кең етек алған. Сондықтан да, плагиат, авторлық құқық, өнертабысты қорғау мен жас ұрпақтың креативті ойлау дағдыларын дамыту сынды мәселелер туындап отыр. Алайда, оқушыларды цифрлық игілікті академиялық адалдық қағидаларын ескере отырып пайдалануға үйрету маңызды. Ауқымды конференция осы мақсатта ұйымдастырылды.

Аталмыш конференция – білім берудегі өзекті мәселелерді талқылау үшін Назарбаев Зияткерлік мектептерінің барлық мұғалімдерін біріктіретін дәстүрлі алаң. Педагогтер қауымы үшін маңызды жиынның алғысөзінде NIS Басқарма төрағасы Әнуар Жанғозин еліміздегі білім сапасын дамытуда Зияткерлік мектептердің үлесін сөз етіп, бірқатар әлеуметтік жобалардың іске асырылу барысын баяндап, «Білім беру өзгерістерінің 1000 көшбасшысы» жобасының нәтижелерімен бөлісті.
Ал, пленарлық отырыстар аясында ұйымға қарасты Білім беру бағдарламалары орталығы директорының орынбасары Галия Алжанова «NIS-Programme» білім беру бағдарламасы аясында академиялық адалдықты игеру қағидалары жайында егжей-тегжейлі ақпарат берді. Бұдан бөлек, әлемде акамедиялық адалдық принциптерінің қалай сақталатыны жайында сараптамалық материалдарымен бөліскен Басқарушы директор Данияр Теміртасов шәкірттерді жастайынан авторлық құқықты сақтауға үйретудің мемлекеттік деңгейдегі маңызына тоқталды. Білім берудегі цифрландырудың тиімді тұстарының бірі – BeyimTech өнімдері де таныстырылды.

Конференцияның пленарлық отырысында «Табысты тәжірибелер панорамасының» ең үздік кейстері анықталып, Зияткерлік мектептердің педагогтері білім берудегі цифрландыру, емтихандар мен дәрістер барысында академиялық адалдық қағидаттарын сақтау мәселелерін қарастырды. Айта кетейік, конференция барысында Назарбаев Зияткерлік мектептерінің мамандары білім сапасын дамытуға қосқан үлесі үшін Оқу-ағарту министрлігінің «Еңбек ардагері» және «Білім беру ісінің құрметті қызметкері» төсбелгісімен марапатталды.

Әсел ҚИБАШ,
Назарбаев Зияткерлік
мектебінің баспасөз хатшысы