Жаңа тыныс әкелген жас мамандар

Арқалық қаласындағы А.Құнанбаев атындағы мектеп-гимназияда жас ұстаздардың кәсіби шеберлігін арттыру және шығармашылық әлеуетін дамыту мақсатында «Жаңашыл мектепке – жаңашыл ұстаз» атты жас мамандар сайысы ұйымдастырылды.

Білім мен білік, жаңашылдық пен ізденіс тоғысқан бұл дода үш кезеңнен тұрды. «Таныстыру» деп аталған алғашқы кезеңде қатысушылар өздерінің педагогикалық ұстанымдары мен өмірлік көзқарастарын шығармашылық тұрғыда жеткізе білді. Мұнда жас мамандардың өзін-өзі ұстау мәдениеті, сөйлеу шеберлігі мен креативтілігі көрінді. Ал «Адал азамат» тақырыбына арналған екінші кезеңде қатысушылар сыныппен жүргізген тәрбие жұмыстарының негізінде адал азамат тәрбиелеудің алты бағыты бойынша жобаларын ұсынып, тәрбиелік мәні айрықша іс-шараларын таныстырды. Қазылар алқасы бұл бөлімде үміткерлердің оқушылармен жұмыс істеу шеберлігін, құндылыққа негізделген тәрбие беру бағытындағы ізденістері мен жаңашылдығына жоғары баға берді. Сайыстың үшінші кезеңінде қатысушылар өнерлерін ортаға салып, ән айту, би билеу және көркем сөз оқу арқылы шығармашылық әлеуеті мен жан-жақтылығын танытып, көрермендерге ерекше әсер сыйлады.
Байқау қорытындысы бойынша үздіктер анықталып, Бас жүлдені математика пәнінің мұғалімі Аружан Ажибаева иеленді. Жүлделі І орын бастауыш сынып мұғалімі Таңшолпан Қапсұлтанға, ІІ орын математика пәнінің мұғалімі Тоғжан Жақсылыққа бұйырды. Ал ІІІ орынды қазақ тілі пәнінің мұғалімі Назерке Забихолла мен Ләззат Кендирбекова өзара бөлісті. Сондай-ақ сайыс барысында бірқатар қатысушыларға арнайы номинациялар берілді. Атап айтсақ, «Шығармашыл жас маман» аталымы математика пәнінің мұғалімі Гүлназым Төленбековаға табысталса, «Жаңашыл педагог» атағына бастауыш сынып мұғалімі Мөлдір Қаби лайық деп танылды. Осылайша, А.Құнанбаев атындағы мектеп-гимназия қабырғасында өткен бұл байқау жас мамандар үшін үлкен тәжірибе алаңына айналып, білім мен тәрбие сапасын арттыру жолындағы маңызды қадам болды.

Ләззат КЕНДИРБЕКОВА,
А.Құнанбаев атындағы
мектеп-гимназияның қазақ тілі мен әдебиеті
пәнінің мұғалімі,
Арқалық қаласы