Жаңартылған білім аясында

Дм.Карбышев атындағы №14 мектептің қазақ тілі мен әдебиеті бірлестігі мұғалімдерінің ұйымдастыруымен «Жаңартылған білім беру аясында оқушылардың функционалдық сауаттылығын арттыру» тақырыбында қалалық семинар өткізілді.

Білім көшін ілгері жылжытып келе жатқан мұғалімдердің басты міндеті – оқушылардың функционалдық сауаттылығын арттыру. Осы бағыттағы жұмыстарымен тәжірибе алмасуы мақсатында ұйымдастырылған семинарға Рудный қаласындағы №7, №13, №15, №18, №19 білім ошақтарының ұстаздары қатысты. Семинар қазақ тілі мен әдебиеті сабақтарында оқушылардың функционалдық сауттылығын арттырудың жолдарын көрсету, сонымен қатар мектепте алған білімдерін әлеуметтік-қоғамдық ортада пайдалана білуге жағдай жасауды көздеді.

Семинар барысында Мусаева Айгерім Нуржанова «Функционалдық сауаттылық – сапалы білім берудің кепілі» атты шебер-сынып коучын өткізді. Қазақ тілі сабағынан Кулжанова Шамшира Мусабековна тәжірибесімен бөлісті. Қазақ әдебиеті пәнінен Сатыбалдиева Лариса Данияровна функционалдық сауаттылықты арттырудың әдістерін өзінің ашық сабағында тиімді көрсете алды. Кейінгі қауымға өнеге-өсиеттерін қанатты қалам арқылы қалдыра білген зерделі ақын, жазушыларымыздың бірі әрі бірегейі Мұқағали Мақатаевқа арналған «Мұқағали – поэзия тұлпары» тақырыбындағы әдеби-сазды кеш К.Каримова екеуіміздің ұйымдастыруымызбен жалғасын тапты.

Семинардың қорытынды сөз кезегі келген қонақтардың еншісінде болды. Әр қатысушы семинардан алған әсерлерімен бөлісіп, әдіс-тәсілдер қоржындарын тәжірибе барысында қолдануға тиімді жаңашыл дүниелермен толықтырғанын жеткізді.

Баян ОМИРЖАНОВА,
Дм.Карбышев атындағы
№14 ЖББМ қазақ тілі мен
әдебиеті пәнінің мұғалімі,
Рудный қаласы