Жақсылық жасауға асығайық

Выпуск - №14 (410) : 03.04.2020

345

ҚР Білім және ғылым министрлігінің бұйрығымен дәстүрлі түрде қолға алынған «Қазақстан – мейірімділік мекені» республикалық балалар бастамасы №1 Ұзынкөл орта мектебінде де қолдау тапты.

Бастаманың басым міндеттері – мектеп жасындағы балаларды отансүйгіштікке, мейірімділікке тәрбиелей отырып, тұрмысы қолайсыз отбасыларға материалдық көмек көрсетуге бағытталған қайырымдылық қызметпен айналысуға тарту. Ең әуелі мектебімізде бірнеше ай көлемінде өтетін игі бастаманың арнайы жоспары құрылып, қатысушыларды ақпараттандыру мақсатында өту барысын айшықтайтын қабырға стенді жасалды. Мектебімізде 2-16-60 сенім телефоны үнемі жұмыс істейді. Бұл бастама барысында «Үмітпен болашаққа» атты мектебіміздің еріктілер жасағы аз қамтылған отбасыларға көмек көрсету үшін мемлекеттік органдардың, бизнес құрылымдардың өкілдерін, меценаттар мен демеушілер, жеке шағын серіктестіктерге, жеке серіктестіктерге барып, акцияға қатысуға шақырды.

Әсіресе жуырда өткен мектепішілік «Жүректен – жүрекке» қайырымдылық жәрмеңкесі дүйім жұртты таң қалдырды. Аталмыш жәрмеңкеге 1-11 сынып оқушылары, мектеп әкімшілігі мен ұстаздар қауымы белсенді қатысып, 207-кабинетте ашылған «Жақсылық жаса!» пунктісінде отбасыларға көмек ретінде киім-кешектер таратты. Сонымен қатар мектебіміздің еріктілер тобы аудан орталығында орналасқан ескерткіш маңын қардан тазалап, белсенділіктерін сөзбен емес, іспен дәлелдеді. Осындай жұмыстардың арқасында жас ұрпақ мейірімді, жомарт және адал болуға үйренбек. Жақсылық жасауға асығайық, ағайын!

Ажар СЕЙТҚАНОВА,
№1 Ұзынкөл ОМ
директорының тәрбие ісі
жөніндегі орынбасары,
Ұзынкөл ауданы