Жаратылыстану пәндеріне саяхат

Дм.Карбышев атындағы №14 жалпы білім беретін мектебінде жаратылыстану ғылымдары апталығы өтті. Оқу форматы аралас болғандықтан, қызыққа толы апталық аясында қашықтан және дәстүрлі форматта іс-шаралар ұйымдастырылды.

Атап айтатын болсақ, викториналық ойындар, 5-6 сыныптар үшін Google формасындағы тесттер, 7-сыныптар үшін Quizizz платформасында викториналық ойындар, сондай-ақ, яндекс платформасында карта жасау шебер-сыныбы өткізілді. Дәстүрлі форматында ӘБ биология пәнінің мұғалімі, Л.Мокрецова 11-сынып оқушылары үшін, «Своя игра» атты экология тақырыбына арналған сыныптан тыс іс-шара өткізді. Ең қызығы, 1-8 сынып оқушылары аралығында «Құстарға қамқор болайық!» атты экологиялық акциясы ұйымдастырылды.

Оқушылар ата-аналарымен бірге құстарға ұяшық жасады. Бұл жерде оқушылардың табиғат жанашыры екендігі көрінді. Сонымен қатар химия пәнінің мұғалімі М.Жайлыбаев 9-сынып оқушылары үшін «Күкірт қышқылы» атты ашық сабақ берді. Сабақ барысында оқушылар күкірттің алу жолдарымен таныс болды. Апталықтың соңғы күні жас мамандар биология пәнінің мұғалімі С.Байдильдина және география пәнінің мұғалімі А.Орманбек бірлесе отырып, «Биология-география әлеміне саяхат!» атты интеллектуалды ойынын өткізді. Ойынға 9 «Ә» сыныбы мен 10 «Ә» сынып оқушылары қатысты.

Ойынның мақсаты – оқушылардың танымдық құзыреттілігін және биология мен география пәніне деген қызығушылықтарын дамыту болды. Интеллектуалды ойын кезінде оқушылар өздеріне беймәлім мәліметтермен танысты. Ойын соңында үздік командалар марапатқа ие болды. Осындай апталықтар кезінде оқушылардың пәнге деген қызығушылықтары арта түседі. Аралас форматта оқыса да, оқушылар интернет-ресурстарын, білім беру платформаларында жұмыс істей алады.

Сымбат БАЙДИЛЬДИНА,
Дм.Карбышев атындағы
№14 ЖББМ биология
пәнінің мұғалімі,
Рудный қаласы