Жас математиктер сайысы

Мектептің 2-4 сынып оқушыларына арналған Республикалық «Бастау» математикалық турнирінің аудандық кезеңі өтті. Команда үш оқушыдан тұрды: 2-сынып, 3-сынып және 4-сыныптардан бір-бір оқушыдан қатысты.

Жас математиктер бақ сынасқан турнирде оқушылар байсалдылықпен күрделі тапсырмаларды орындады. Ең мықтылардың көшін бастау үшін Науырзым ауданынан 20-дан астам оқушы келіп, білімін ортаға салды. Байқау екі кезеңде өтті: «Әу, баста!» және «Математикалық бәйге». Қатысушылар білімдерін ғана емес, командада жұмыс істей алу қабілеттерін де көрсетуі қажет болды. Тапсырмалардың барлығы логикалық ойлауды анықтау мақсатында құрастырылған, сондықтан балалар өз көзқарастарын білдіріп, әділ қазылар алқасының алдында мәселені шешу жолдарын қорғады.

Нәтижесінде жеке сынақта Шолақсай ЖББ мектебі және Науырзым ЖББ мектебінің оқушылары көзге түсті. Балалар математикалық білімнің және сыни ойлаудың жоғары деңгейін, ынтымақтастық дағдыларын және командада жұмыс істей білу қабілеттерін көрсете отырып, барлық сынақтардан сүрінбей өтті. Турнир қорытындысы бойынша Шолақсай ЖББ мектебінің командасы І орын иеленіп, облыстық кезеңге жолдама алды. Ал командалар арасында турнир кубогына Шолақсай ЖББ мектебінің оқушылары ие болды.

Қанымкүл ВАЛИЕВА,
Науырзым ауданы
білім бөлімінің бастауыш
сынып әдіскері