Жас өнерпаз – Жақсылық

Мемлекеттік тілде оқытатын Заречный ЖББ мектебінде әкенің салмақты тәрбиесін алып, әкесінен көрген істі өзінің сүйікті кәсібіне айналдырған оқушылар баршылық. Солардың бірі – 9 «Ә» сынып оқушысы Мінәсіп Жақсылық.

Отбасындағы ұл тәрбиесінде әке мен аталардың орны ерекше. Әке – отбасы мүшелерінің тірегі, асырап сақтаушысы, қамқоршысы. Әкенің мінез-құлқы, өнер-білімі – ұл баланың көз алдындағы үлгі-өнеге алатын, соған қарап өсетін негізгі нысаны. Өнегелі, өнерлі, «Сегіз қырлы, бір сырлы», намысшыл азамат тәрбиелеу аталар арманы болған. Ал аталар жолын қуып, өнері мен өнегелі ісін жалғастыру жастарға да үлкен сын болып саналған. «Ата көрген оқ жонар» деген мақал соны меңзейді.

Әке жолын қуып, ісін жалғап жүрген Жақсылық, бос уақытында қағаздан, т.б. материалдардан түрлі ұшақ, машина сиякты бұйымдарды жасайды. Бұл іске деген қызығушылығы 5-сыныптан бастап ашылып, содан бері осындай заттарды жасауды әдетке айналдырған. Кеңес Одағының батыры, ұшқыш Талғат Бигелдиновтың туғанына 100 жыл толуына орай, аудандық сайысқа үлкен ұшақ жасады. Жақында Жақсылық Қостанай аудандық «Алтын дән» мәдениет үйінің «Bal-bala» балалар жобасына қатысқан үшін «Ең үздік талант» номинациясымен марапатталды.

«Алтын дән» мәдениет үйінің «Bal-bala» балалар жобасы Қостанай ауданының талантты және дарынды балаларымен таныстырады. Жүргізушісі – Қостанай аудандық «Алтын дән» мәдениет үйінің қызметкері Таңшолпан Мадиева. Аталмыш жобада Жақсылық өзінің жасаған дүниелерін ұсынып, олардың жасалу техникасымен де көпшілікпен бөлісті. Жақсы сұхбат жасап, өзінің келешектегі жоспарлары мен арман-мақсаттарын айтып өтті.

Жақсылық бос уақытында осындай керемет дүниелерді жасағанды жаны сүйеді. Келешекте осы өнерін дамытып, архитектор мамандығына оқуға түсіп, еліміздің дамуы мен өркендеуіне өз үлесін қосқысы келеді. Ендеше талабы таудай, болашағына сеніммен қарайтын шәкіртімізге тек ақ жол тілейміз!

Қаламқас ДУЛЫБАЕВА,
Мемлекеттік тілде оқытатын
Заречный ЖББМ математика
пәнінің мұғалімі,
Қостанай ауданы