Жас ұстаздар бақ сынасты

Науырзым ауданы білім беру бөлімінің жұмыс жоспарына сәйкес және «Рухани жаңғыру» бағдарламасының «Тәрбие және білім» кіші бағдарламасы аясында Жамбыл ОМ «Ел ертеңі – жастар» атты облыстық байқау өтті.

Жас ұстаздар қатысқан шараға Науырзым ауданы білім беру бөлімінің басшысы Г.Дускулова, Қостанай облысы білім басқармасының инновациялық-эксперименттік қызмет және шағын жинақты мектептерді дамыту бөлімінің басшысы Нұргүл Нұғыманова, тәрбие жұмысы және тұлғаны әлеуметтендіру бөлімінің басшысы Нұржан Оразғалиұлы, Науырзым ауданының ішкі саясат бөлімінің Жастар ресурстық орталығының директоры Сүлеймен Жұман, ауданымыздың білім беру ұйымдарының директорлары, тәрбие ісі жөніндегі директордың орынбасарлары және педагогикалық ұжым қатысты.

Байқауға 9 өңірден 9 білім беру мекемелеріндегі жас маман ұстаздар: Рудный қаласындағы №19 ОМ бастауыш сынып мұғалімі Арай Жакиева, Федоров ауданындағы №2 ОМ технология пәнінің мұғалімі Әйгерім Катешова, Ұзынкөл ауданындағы Российская ОМ қазақ тілі пәнінің мұғалімі Самал Әуезханова, Б.Майлин ауданындағы С.Ерғалиев атындағы ОМ география пәнінің ұстазы Тұралы Орынбай, Арқалық қаласындағы Ш.Уәлиханов атындағы №1 ЖОББМ математика пәнінің мұғалімі Динара Сәкен, Амангелді ауданындағы Жаңа ауыл ЖББОМ орыс тілі мен әдебиеті пәнінің мұғалімі Аманат Қазқанов, Қостанай ауданындағы мемлекеттік тілде оқытатын Заречный ОМ музыка пәнінің мұғалімі Нұриден Қабыкенов, Қостанай қаласындағы №1 мектеп-лицейдің ағылшын тілі пәнінің мұғалімі Дарын Отынбай, Науырзым ауданындағы Жамбыл ОМ математика пәнінің мұғалімі Қамбар Намиалиев қатысты.

Облыстық байқау 5 кезеңнен тұрды. Атап өтер болсақ, «Мен ұстазбын!» өзін-өзі таныстыру кезеңінде қатысушы өзінің педагогикалық идеяларын аша отырып, өмірлік басымдықтары мен балаларға, мамандығына, әріптестерімен қарым-қатынастары жайында презентация көрсетті. «Өнерлінің өрісі кең» кезеңінде өз өнерлерін ортаға салды, «Қазақтың қолөнері» кезеңі бойынша қатысушылар қолдан жасалған қолөнер бұйымдарын ұсынды, «Дәстүрдің озығы бар...» кезеңінде салт-дәстүрден сұрақтар қойылымын көрсетті. Ал, «Білімді мыңды жығар...» кезеңінде Тәуелсіз Қазақстанның даму тарихы және қазақ халқының салт-дәстүрлерінен сұрақтар қойылды.

Нәтижесінде Рудный қаласындағы №19 ОМ бастауыш сынып мұғалімі Арай Жакиева 1-орын, Қостанай қаласындағы №1 мектеп-лицейінің ағылшын тілі пәнінің мұғалімі Дарын Отынбай 2-орын, ал Амангелді ауданы Жаңа ауыл ЖББОМ орыс тілі мен әдебиеті пәнінің мұғалімі Аманат Қазқанов 3-орынды қанжығасына байлады. Сайыс соңында қатысушыларға мадақтама қағаздары мен сыйлықтар табысталды.

Тағы бір айта кетерлігі – іс-шара барысында «Рухани жаңғыру – ұлттың сарқылмас байлығы» тақырыбында аудандық балалар шығармашылығының көрмесі ұйымдастырылды. Көрмеге Докучаев, Мереке, Дәмді, Шилі, Шолақсай, Өлеңді, Раздольная, Жамбыл, Балалар шығармашылық үйі белсене ат салысты. Нәтижесінде 1-орынды Жамбыл ОМ, 2-орынды Балалар шығармашылық үйі, ал 3-орынды Мереке НМ иеленіп, Қостанай облысы әкімдігі білім басқармасының дипломдарымен марапатталды.

Алмагүл ЖАРҚЫМБАЕВА,
Науырзым ауданы білім беру бөлімінің әдіскері