Жасанды интеллектке қадам

2–7-сынып оқушыларына арналған «Зерде» республикалық зерттеу жобалары мен шығармашылық жұмыстар байқауының облыстық кезеңінде Ы.Алтынсарин атындағы гимназияның оқушысы Ершов Митрий жүлделі III орынды иеленді.

«Зерде» байқауы – жас зерттеушілердің ғылыми ойлау қабілетін дамытуға, ақпараттық технологиялар саласына қызығушылығын арттыруға және шығармашылық әлеуетін ашуға бағытталған беделді білім сайысы. Облыстық кезеңге өңірдің ең үздік жобалары іріктеліп, жұмыстар қазылар алқасы тарапынан жан-жақты сарапталды.
Ершов Митрий байқауға «ИИ чат-бот» тақырыбындағы зерттеу жобасын ұсынып, жасанды интеллект технологияларының мүмкіндіктерін, қолданылу аясын және білім беру үдерісіндегі маңызын жан-жақты талдады. Жоба мазмұнының өзектілігі, практикалық бағыттылығы және қорғау кезіндегі сенімді тұсаукесері қазылар алқасының жоғары бағасына ие болды.
Оқушы жұмысын қорғау барысында теориялық білімін тәжірибемен ұштастыра алатынын, логикалық ойлау және бағдарламалау дағдыларының қалыптасқанын көрсете білді. Аталмыш ғылыми жоба оқушының информатика пәніне деген тұрақты қызығушылығы мен болашақта IT саласын меңгеруге деген талпынысын айқындады.
Жетекшісі ретінде көрсеткен жүйелі бағыт-бағдар мен қолдау оқушымның ғылыми-зерттеу жұмысты сапалы деңгейде орындауға мүмкіндік берді. Бұл жетістік – жастардың заманауи технологияларды меңгеруге деген қызығушылығының артып келе жатқанын көрсетеді. Жас зерттеушіге алдағы уақытта да жаңа табыстар мен биік белестер тілейміз.

Жансая СЕКСЕМБАЕВА,
Ы.Алтынсарин атындағы
гимназияның информатика пәнінің мұғалімі,
Арқалық қаласы