Жетістікке толы таланттар

Білім беру саласының дербестігін жақсарту, білім беру ісін басқаруды демократияландыру еліміздің мектептерінде оқытудың белсенді және инновациялық әдістері мен технологияларын тиімді пайдалануды қажет етеді. 

Оқытуда жаңашыл әдісті қолдану оқушы үшін де, мұғалімге де шығармашылықпен жұмыс істеуге ықпал етеді. Білім беру жүйесіндегі өзгерістер: «педагогикалық технологиялар», «тәсіл», «әдіс» сияқты ұғымдарды терең меңгеруге, оларды оқып-үйренуге жетелейді. Бүгінгі таңда бастауыш сыныптағы сабақтарымда топқа бөліп оқыту, рөлдік ойын элементтері, пікірсайыс және басқа да дәстүрлі емес әдістер мен оқытудың жаңа технологиялары тәжірибеге кеңінен ене бастады. Сондықтан өзім оқыған, үйренген, курстар мен семинарларға қатысу барысында көрген жаңаша әдіс-тәсілдерді өзімнің іс-тәжірибемде қолдану арқылы олардың тиімділігіне көз жеткіздім.

Жалпы оқытудың тиімділігін арттырудың жолдары өте көп. Оқыту үрдісінде жаңашыл әдістерді пайдалану мұғалімнің шеберлігіне қарай жүзеге асады. Оқушылардың шығармашылығын, танымдық белсенділігін арттыруда оқушының өз бетімен ізденіп, шығармашылық ой-өрісін арттыруда шығармашылық сабақтарды өткізудің алатын маңызы ерекше. Әрине, күнделікті сабақ барысында осы дағдыларды үнемі тиімді қолданар болса, уақыт өте келе ол өзінің нәтижесін көрсетеді. Бірінші тоқсанның қорытындысы бойынша оқушыларым республикалық, қалалық және мектепшілік сайыстарда жақсы жетістіктерге жетіп, мақтау қағаздарымен марапатталғанын айтып өткім келеді. Бұл, әлбетте, менің мерейімді асырмай қоймайды.

Набира БЕКЕТАЕВА,
Ә.Бөкейхан атындағы ЖББМ
сынып жетекші,
Рудный қаласы