Зымыранмен көкке көтерілген арман

Жуырда Астана қаласында 9-11 (12) сынып оқушыларына арналған «Ғылым әлемін ашамыз» атты ғарыштық зерттеулер бойынша халықаралық байқау өтті. Кіл мықтылар тоғысқан додада 200-ге жуық қатысушының арасынан топ жару – үлкен еңбектің жемісі.

Үш бағыт бойынша өткен байқау қорытындысына сәйкес, жеңімпаздар мен жүлдегерлер ҚР Оқу-ағарту министрі Жұлдыз Сүлейменованың қолынан I, II және III дәрежелі дипломдармен, сондай-ақ алтын, күміс, қола медальдармен марапатталды. Атап айтсақ, 22 оқушы – І орын, 35 оқушы – ІІ орын, ал 58 оқушы ІІІ орын иегері атанды. Айтулы додада «Rocket Science – Model Rocket section» бағыты бойынша өңіріміздің атынан бақ сынаған Қостанай қаласындағы №15 жалпы білім беретін мектептің 9-сынып оқушылары Арсен Ермекұлы мен Давид Есмағамбетов алтын тұғырдан көрініп, жеңімпаз атанды. Оның арқауында оқушылардың табандылығы мен үздіксіз ізденісі, көркем еңбек пәнінің мұғалімі Ермек Мурзалиннің кәсіби қолдауы, сонымен қатар жиырма екі жылдық еңбек өтілі бар физика пәнінің ұстазы, педагог-шебер Салтанат Маженованың білікті жетекшілігі мен тынымсыз еңбегі жатыр. Физика-математика бағытын таңдаған жас ізденушілердің жобасы техникалық тұрғыдан ғана емес, экологиялық маңызымен де әділ қазылардың жоғары бағасына ие болды. Олар адам аяғы жете бермейтін аймақтарға тұқым шашуға қауқарлы зымыран үлгісін құрастырған. Жобаның қыр-сырымен бөліскен Арсен Ермекұлы былай дейді: «Зымыранымызды картон мен пеноплекстен дайындап, оның мұрын бөлігіне тұқымды орналастырдық. Таңдағанымыз – қыша тұқымы. Біздің жобамыздың мақсаты – үлкен жылдамдық пен жоғары температурада «ұшқан» және «ұшпаған» тұқымдарды жерге шашып, олардың қаншалықты айырмашылықпен өсетінін бақылау», – деп түсіндірді. Бұл – ғылым мен табиғатты ұштастырған тың бастама.

Байқаудың ең шешуші сәті – зымыранды көкке ұшыру кезеңі болды. Тынымсыз еңбек пен қателіктермен жұмыстың нәтижесінде қостанайлық өрендердің зымыраны аспанға көтерілді. «Барлық қатысушыларға бірдей арнайы қозғалтқыш берілді. Оны зымыранға орнатып, үш рет ұшырып, жобамызды қорғап шығуымыз қажет болды. Екінші мәрте ұшырғанымызда 103 метр биіктікке көтеріліп, ішіндегі тұқымдар шашылды, ал парашют жоспарланғандай сәтті ашылды. Сол сәттегі қуанышымызды сөзбен жеткізу қиын», – дейді Давид Есмағамбетов тебіреніспен.
Жетекшілері Салтанат Маженованың шәкірт тәрбиелеудегі шеберлігі сүйсінтеді. Ықыласпен айтқан әр сөзінен жобаға бар білімін, тәжірибесін және жүрек жылуын арнағаны байқалады. «Жеңіспен оралған сәтте оқушылар мен әріптестер бізді зор құрметпен қарсы алды. Сондайда қолдаудың қаншалықты маңызды екенін түсінесің. Енді осы Арсен мен Давидтің жетістігіне қарап, 7–8-сыныптың оқушылары да сұрап, физикаға қызығушылық танытып жатыр. Бұл ұстаз ретінде мені қуантпай қоймайды», – дейді Салтанат Толендиновна мақтанышпен.

Жамал ШАУКЕН,
Суретті түсірген автор